2018 йил 17—18 май кунлари Самарқанд шаҳрида Халқаро автомобиль транспорти бўйича Ўзбекистон—Туркия қўшма комиссиясининг навбатдаги мажлиси бўлиб ўтди. Бу ҳақда Ўзбекистон автомобиль транспорти агентлиги матбуот хизматига таяниб, UzDaily хабар берди.
Томонлар 2017 йилнинг октябрь ойида ва 2018 йил апрелида ўтказилган юқори даражадаги музокаралар халқаро автомобиль транспорти соҳасида икки томонлама ҳамкорликни янада ривожлантириш учун янги истиқболларни очиб берганини таъкидлаб ўтди.
Шавкат Мирзиёэвнинг 2017 йил октябрь ойида Туркияга амалга оширган давлат ташрифи Ўзбекистон ва Туркия ўртасида йўловчи ва юкларни халқаро автомобилларда ташиш борасидаги янги битимларнинг имзоланишига сабаб бўлган.
Учрашув чоғида икки мамлакат ўртасида халқаро автомобиль транспорти учун қулай шарт-шароит яратиш, 2018 йилга рухсатнома шаклларини алмашиш учун қўшимча квоталар белгилаш ва 2019 йилга мўлжалланган квоталарни муҳокама қилинди, жумладан, янги келишув қоидаларини ҳисобга олган ҳолда фикрлар алмашилди, шунингдек, Ўзбекистон ва Туркия ўртасидаги автомобиль транспортига оид амалий масалалар кўриб чиқилди.
Халқаро автомобиль транспорти бўйича Ўзбекистон—Туркия қўшма комиссиясининг йиғилиши якунлари бўйича якуний протокол имзоланди.
Изоҳ (0)