“Islom.uz”: har xil bahonalar o‘ylab topish va ro‘za tutishga qo‘rqish kerak emas

“Islom.uz” Ramazon oyini munosib kutib olish haqida maqola e’lon qildi. Uni to‘lig‘icha keltirib o‘tamiz.

Mana, barcha mo‘min-musulmonlar kutib turgan muborak Ramazon oyi kirib keldi. Bu ro‘za oyi biz uchun muborak vaqt, negaki bu oyda ibodat amalining mukofoti bir necha barobar ko‘paytiriladi.

Biroq musulmonlarda Ramazon oyiga turli xil munosabat mavjud. Bir xillar uchun Ramazon oyi Yaratgan Egasiga puxtalik bilan va imkon kadar yaxshiroq ibodat qilish oyi bo‘lib, unda Allohning roziligiga erishishga harakat qilinadi. Ular uchun Ramazon oyi – muhim, bebaho, noyob va mushtoq bo‘lib kutilgan hodisadir. Ular barcha harakat va amallar uchun mukofot bir necha barobar berilishiga ishongan holda deyarli hamma vaqtini ibodatda va savob amallarni bajarishda o‘tkazadi.

Boshqa xildagi odamlar ham borki, ular Ramazonni birmuncha g‘amginlik bilan “kutib oladi”. Ular yuragi siqilib, javrab, g‘ingshib ro‘zani o‘tkazadi. Katta qiyinchilik bilan yeyish, ichishdan tiyiladi va boshqa cheklovlarga rioya qiladi. Shuningdek ular masjidga kechki ibodat, tarovih va boshqa jamoa namozlariga zo‘rg‘a o‘zlarini sudrab boradi.  Shunga ular uchun Ramazon oyi – cheklovlar, muhtojliklar va qiyinchiliklar oyidir.

Afsuslar bo‘lsinki, musulmonlarning yana bir toifasi ham borki, ular Ramazon oyi bilan umuman ko‘rishishni xohlamaydi. Ular ro‘za tutishni, masjidga borishni, tarovihda turish va boshqa ibodatlarni qilishni xohlamaydi. Ular turli xil asossiz dalillar bilan o‘zlarini ro‘za tutish farzidan ozod qilishga harakat qiladi. Ayrimlari havoning issiqligi va kunning uzunligiga dalil keltiradi, ayrimlar esa go‘yoki ro‘za sababli sog‘liqlari yomonlashganini bahona qilib o‘zlarini oqlashga harakat qiladi, ayrimlar uzoq vaqt yig‘gan vaznni yo‘qotishdan qo‘rqishini tushuntiradi.... shu kabi asossiz bahonalarni yana ko‘plab topish mumkin. Qancha ro‘za tutmaganlar bo‘lsa, shuncha bahona ham bor.

Alloh taolo O‘zining bandalariga o‘zlari toqat qilolmaydigan vazifaga buyurmagan va ularga o‘zlari ko‘tara olmaydigan ishni yuklamagan, muborak Qur’onda aytilganidek (keltirilganidek):

“Alloh hech qachon bir jonni toqatidan tashqari narsaga taklif qilmas. Foydasi ham kasbidan, zarari ham kasbidan” (Baqara surasi, 286-oyat )

Shuning uchun turli xil asossiz dalillar keltirish, turli xil bahonalar o‘ylab topish va ro‘za tutishga qo‘rqish kerak emas.

Muhammad sollallohu alayhi vasallam ummatiga Ramazon oyida ro‘za tutish to‘g‘risida oyat yuborilganiga bir ming to‘rt yuz yil bo‘ldi va shu vaqtgacha ro‘za insonlarga hech qanday qo‘rqinchli narsa olib kelmagan.

Aka-ukalar va opa-singillar! Alloh taolodan qo‘rqinglar, o‘zingizni vaqtingizni nisbatan qadrsiz munosabatda bo‘lmang, o‘zingizni hayotingizni sizga foyda keltirmaydigan ishlarga sarflamang. Imkon boricha Oxirat uchun foydali bo‘lgan savob ishlarni qilishga harakat qiling aynan shu yo‘l bilan siz musulmonning eng asosiy maqsadi bo‘lmish Alloh Taoloning roziligiga erishasiz.

Balkim bu sizni oxirgi Ramazoningizdir, kechirilishingiz va darajasini bizdan sir tutgan Alloh taoloning maxsus mukofotini olishingiz mumkin bo‘lgan oxirgi imkoniyatdir, Abu Hurayra (r.a.) keltirgan hadisi sharifda aytilganidek:

“Inson (Odam avlodi)ning har bir amali uchun mukofoti o‘ntaga ko‘paytiriladi va hattoki yetti yuzga borishi mumkin. Alloh taolo aytadi: “Faqat ro‘za mukofoti bundan istisno, darhaqiqat bu (amal) Men uchun va O‘zim mukofotini beraman(negaki inson Men uchun ro‘za tutadi)” (Ibn Moja)

Ramazon oyi – Alloh taoloning O‘zining bandalariga nisbatan oliyhimmat ne’matlarini namoyon bo‘lishidir.

Bundan o‘zingizni hayotingizda keskin burilish sifatida foydalaning, yaxshi tomonga shakllanish sifatida foydalaning, sharmandalik gunohlaridan yuz o‘girib itoat va ibodatga buriling, chunki shu maqsad uchungina biz yaralganmiz.

Alloh taolo Qur’onda aytgan:

“Men jin va inslarni O‘zimga ibodat qilish uchun yaratdim”. (Zoriyot surasi, 56)

Bizning solih o‘tmishdoshlarimiz Alloh taolodan olti oy Ramazon oyini kutib olish imkoniyatini so‘rashgan, keyin esa besh oy Alloh taolodan o‘zlarining Ramazon oyida qilgan savob amallarini va ibodatlarini qabul qilishini so‘rashgan.