Manba: O‘zbekiston 2021-yilgacha lotin yozuviga asoslangan o‘zbek alifbosiga bosqichma-bosqich to‘liq o‘tadi

O‘zbekiston hukumati “Lotin yozuviga asoslangan o‘zbek alifbosini joriy etish to‘g‘risida”gi qonun qoidalari istisnosiz va so‘zsiz bajarilishini ta’minlash choralarini ko‘radi. Bu haqda, o‘z manbalariga asoslanib, Telegram’dagi @davletovuz kanali ma’lumot tarqatdi.

Shu maqsadda hukumat va Prezident devoni tegishli xizmati o‘rtasida maxsus Harakatlar rejasi tasdiqlangan. Unga ko‘ra, amaldagi qonun hamda hukumat qarori yanada takomillashtiriladi.

Shu bilan birga, tegishli qonunchilik talablari so‘zsiz bajarilishini ta’minlashga qaratilgan huquqiy mexanizmlar ishlab chiqiladi.

O‘zbek tilidagi reklama matnlari va lavhalari lotin yozuviga asoslangan o‘zbek alifbosida yozilishi ta’minlanadi. Respublikada barcha idoralar va muassasalar uchun lotin alifbosi bo‘yicha malaka oshirish kurslari tashkil etiladi.

Kirill yozuvidagi o‘zbek va jahon adabiyotining mumtoz namunalari va ilmiy adabiyotlari lotin yozuvida chop etiladi. Bosma va elektron ommaviy axborot vositalarining lotin yozuviga asoslangan o‘zbek alifbosida faoliyat yuritishi to‘liq ta’minlanadi.

Bu 2020-yilning oxiriga qadar to‘liq uddalanishi kerak bo‘ladi.