16-may, chorshanba kuni O‘zbekiston Milliy olimpiya qo‘mitasida O‘zbekiston karate milliy federatsiyasining navbatdan tashqari saylov konferensiyasi bo‘lib o‘tdi. Bu haqda qo‘mita matbuot xizmati xabar berdi.
Konferensiyada federatsiya prezidenti lavozimiga 1996—2006-yillar mobaynida federatsiyani muvaffaqiyatli boshqarib, qator yutuqlarga erishgan mutaxassis, O‘zbekiston Respublikasida xizmat ko‘rsatgan sport ustozi, qora belbog‘ 6-DAN sohibi Nurxon Nafasov nomzodi ilgari surildi.
Konferensiya ishtirokchilari nomzodni bir ovozdan qo‘llab quvvatladi va Nurxon Nafasov 12 yillik tanaffusdan so‘ng yana O‘zbekiston karate milliy federatsiyasi prezidenti etib saylandi, deyiladi xabarda.
Avvalosi menga bildirilgan yuksak ishonch uchun O‘zbekiston Milliy olimpiya qo‘mitasiga, Jismoniy tarbiya va sport vazirligiga cheksiz minnatdorchilik izhor etaman. Zimmamga nechog‘lik mas’uliyatli vazifa yuklanayotganligini juda yaxshi his qilib turibman. Ammo ishonchim komilki, birgalikda biz o‘z oldimizga qo‘yilgan barcha maqsadimizga yetisha olamiz. Bu yerda o‘tirganlarning ko‘pchiligi bilan yaqindan tanishmiz, ayrimlari bilan karate rivoji yo‘lida yelkama-yelka xizmat qilganmiz. Asosiy maqsad karatening ommaviyligini oshirish, iqtidorli sportchilar tayyorlash tizimini isloh qilish va shu orqali xalqaro maydondagi natijalarni yaxshilashdan iboratdir. Yaxshi ma’lumki, 2020-yili Tokioda bo‘lib o‘tadigan Olimpiya o‘yinlari dasturidan tarixda birinchi marta karate sport turi ham o‘rin olgan. Shak-shubhasiz, bu sportning ushbu turi uchun tarixiy voqea hisoblanadi va ishonamanki, kunchiqar yurtda o‘zbek karatechilari, o‘zimizning qorako‘zlar ham Olimp shohsupasiga ko‘tarilishadi. Buning uchun esa tayyorgarlikni bugundan boshlash lozim. Yaqin 2 yil ichida kerak bo‘lsa, kuniga 24 soatdan mehnat qilishimiz, yagona maqsad yo‘lida birlashishimiz, mamlakatimizda sportning yakkakurash turlari orasida karatening nufuzini oshirishga intilishimiz kerak. Yuqorida sanab o‘tilgan maqsadlarga erishish yo‘lida men barchani eshitishga, fikr almashishga tayyorman. Bu borada har biringizning taklifingiz men uchun g‘oyatda muhim.O‘z navbatida Nurxon Nafasov oldiga qisqa fursat ichida federatsiya faoliyatini tubdan isloh kilish, iqtidorli sportchilar tayyorlash tizimini yaratish, terma jamoa tarkibida raqobatni kuchaytirish, murabbiylar malakasini oshirish, Osiyo va Olimpiya kabi nufuzli musobaqalarda yurtimiz sharafini munosib himoya qila oladigan sportchilarni tarbiyalash vazifasi yuklatildi, deyiladi xabarda.Nurxon Nafasov, O‘zbekiston karate milliy federatsiyasi prezidenti
Izoh (0)