Toshkentning Chorsu dahasidagi kitob do‘konlari va boshqa ko‘plab manzillarda shayx Muhammad Sodiq Muhammad Yusuf hazratlarining kitoblari juda qimmat narxlarda sotilmoqda. Do‘kondorlarning qilayotgan ishlari noto‘g‘ri bo‘lsa, nega ularga hech kim chora ko‘rmaydi? Foydalanuvchining ushbu savoliga “Islom.uz” sayti mutasaddilari quyidagicha javob havola qildi.
“Ko‘pchilikka yaxshi ma’lum, bizning do‘konlarda ushbu talab yuqori bo‘lgan kitoblarni bir kishiga bir donadan sotilmoqda. Bu orqali kitoblarni ko‘proq kitobxonlarga o‘z narxida yetkazishga muvaffaq ham bo‘lyapmiz. Lekin ba’zi savdogarlar bir necha marta kelib yoki bir nechta odam kiritib, kitoblarni olib ketayotgan hollari ham bor. Ular filiallarimizga ham qayta-qayta borib kitob olishadi. Bundan tashqari, do‘kondorlargina emas, balki oddiy xaridorlar ham kitoblarni o‘qish uchun emas, balki bizda tugagandan so‘ng qayta sotish uchun olib qo‘yishyapti.
Nashriyot xodimlari Chorsudagi ko‘pchilik sotuvchilarga bunday qilmaslik kerakligini, narxlarni insof bilan qo‘yishni alohida ta’kidlash uchun bir necha marotaba uchrashishdi. Chunki hozirda bir kitobni 3 barobadan ham oshiq narxda sotayotganlar ham uchrab turibdi.
Shuningdek, kitobxonlardan ham olibsotarlardan juda qimmat narx qo‘yilgan kitoblarni xarid qilmasliklarini iltimos qilardik. Ularning asl narxini nashriyot saytidan bilib turish mumkin.
Kelgusida ushbu kitoblar sonini bir necha barobar ko‘p adadda chiqarish rejalashtirilgan. Oldin har bir kitobning adadi 5000 donadan oshmas edi va ruxsat olish vaqti ham cho‘zilib ketar edi. Oxirgi bir necha oydan beri kitoblarga ruxsat juda tez beriladigan va adadi esa ancha ko‘p miqdorda beriladigan bo‘ldi.
Hozirgi kunda ‘Islom tarixi’ kitobi 10000, ‘Baxtiyor oila’ kitobi 20000 adadda chop etilmoqda. ‘Tafsiri Hilol’ asarini ham 15000 adadda chop etishga ruxsat olindi. Bundan buyon kitoblar narxi keskin arzonlashib boradi degan umiddamiz”.
Izoh (0)