Тошкентнинг Чорсу даҳасидаги китоб дўконлари ва бошқа кўплаб манзилларда шайх Муҳаммад Содиқ Муҳаммад Юсуф ҳазратларининг китоблари жуда қиммат нархларда сотилмоқда. Дўкондорларнинг қилаётган ишлари нотўғри бўлса, нега уларга ҳеч ким чора кўрмайди? Фойдаланувчининг ушбу саволига «Islom.uz» сайти мутасаддилари қуйидагича жавоб ҳавола қилди.
«Кўпчиликка яхши маълум, бизнинг дўконларда ушбу талаб юқори бўлган китобларни бир кишига бир донадан сотилмоқда. Бу орқали китобларни кўпроқ китобхонларга ўз нархида етказишга муваффақ ҳам бўляпмиз. Лекин баъзи савдогарлар бир неча марта келиб ёки бир нечта одам киритиб, китобларни олиб кетаётган ҳоллари ҳам бор. Улар филиалларимизга ҳам қайта-қайта бориб китоб олишади. Бундан ташқари, дўкондорларгина эмас, балки оддий харидорлар ҳам китобларни ўқиш учун эмас, балки бизда тугагандан сўнг қайта сотиш учун олиб қўйишяпти.
Нашриёт ходимлари Чорсудаги кўпчилик сотувчиларга бундай қилмаслик кераклигини, нархларни инсоф билан қўйишни алоҳида таъкидлаш учун бир неча маротаба учрашишди. Чунки ҳозирда бир китобни 3 баробадан ҳам ошиқ нархда сотаётганлар ҳам учраб турибди.
Шунингдек, китобхонлардан ҳам олибсотарлардан жуда қиммат нарх қўйилган китобларни харид қилмасликларини илтимос қилардик. Уларнинг асл нархини нашриёт сайтидан билиб туриш мумкин.
Келгусида ушбу китоблар сонини бир неча баробар кўп ададда чиқариш режалаштирилган. Олдин ҳар бир китобнинг адади 5000 донадан ошмас эди ва рухсат олиш вақти ҳам чўзилиб кетар эди. Охирги бир неча ойдан бери китобларга рухсат жуда тез бериладиган ва адади эса анча кўп миқдорда бериладиган бўлди.
Ҳозирги кунда ‘Ислом тарихи’ китоби 10000, ‘Бахтиёр оила’ китоби 20000 ададда чоп этилмоқда. ‘Тафсири Ҳилол’ асарини ҳам 15000 ададда чоп этишга рухсат олинди. Бундан буён китоблар нархи кескин арзонлашиб боради деган умиддамиз».
Изоҳ (0)