4-may kuni jinoyat ishlari bo‘yicha Surxondaryo viloyati Qiziriq tuman sudi, Qiziriq tumani pedagogika kolleji binosida, ochiq sayyor sud majlisi o‘tkazdi. B.Mamadaminov raisligidagi sudda yangi tug‘ilgan chaqalog‘ini o‘ldirib, kanalga tashlab yuborgan kollej o‘quvchisi N.T.ning ishi ko‘rib chiqildi. Sudning “Daryo”ga ma’lum qilishicha, kollej o‘quvchisi Jinoyat kodeksining 99-moddasi (Onaning o‘z chaqalog‘ini qasddan o‘ldirishi) bilan ayblangandi.
Sudlanuvchi N.T. 1999-yil 6-may kuni Qiziriq tumanida tug‘ilgan, millati o‘zbek, O‘zbekiston Respublikasi fuqarosi, ma’lumoti o‘rta, turmushga chiqmagan, muqaddam sudlanmagan, Qiziriq pedagogika kollejining 2-bosqich talabasi.
N.T.ning so‘zlariga ko‘ra, u 2016-yil noyabr oyida Sherobod tumanida yashovchi O‘.B. bilan tanishib, u bilan doimiy telefonda gaplashib yurgan. 2017-yil mart oyi oxirlarida yarim tunga yaqin N.T. yashovchi uyda ular uchrashgan va ixtiyoriy ravishda jinsiy aloqada bo‘lgan. Bu holat ikki oydan so‘ng yana takrorlangan. May oyida N.T. O‘.B.ning amakivachchasi A.B. bilan tanishgan. A.B.ning so‘zlariga ko‘ra, may oyining o‘rtalarida va iyun oyining boshida u ikki bor N.T. bilan jinsiy aloqada bo‘lgan. O‘.B. N.T. amakivachchasi bilan uchrashib yurganidan xabar topgach, qiz bilan gaplashmay qo‘yadi.
Qiz homiladorligini sezib qolgach, 2017-yil dekabrida A.B.ga telefon qilib, homiladorligini aytadi. A.B. bola o‘zidan bo‘lganini tan olmaydi va N.T.ning amakivachchasi O‘.B. bilan uchrashganini eslatib qo‘yadi. Homila kattalashavergach, qiz amakivachchalarga yana telefon qiladi va homilani tushirish uchun uni Sheroboddagi kasalxonada UZIga tushirishlarini so‘raydi. 2018 yil yanvarida O‘.B va A.B. Sheroboddagi kasalxonada N.T.ni UZI apparatiga tushiradi. Tekshiruv homila 6 oylik bo‘lganini ko‘rsatgan. Shifokor ularga homila kattaligi, uning tug‘ilishiga oz qolgani uchun abort qilishning imkoni yo‘qligini aytadi. Yigitlar qizni o‘z mahallasiga olib borib qo‘yib, “Biz seni tanimaymiz” deb ketadi va N.T. bilan ortiq gaplashmaydi. Qiz homiladorligini oilasi va boshqalardan yashirish uchun uyida va kollejda qalin kiyinib yuradi.
N.T. 28-fevral kuni soat 9:00 larda qattiq og‘riq his qilib, o‘zi yotadigan xonada baqira boshlaydi. Xonaga kirgan onasiga hamma joyi og‘riyotganini aytadi. Onasi unga og‘riq qoldiradigan dori berib chiqib ketadi. N.T.da og‘riq kuchayib, tug‘ruq boshlanadi. U hech kimning yordamisiz o‘g‘il bola chaqaloqni dunyoga keltiradi. Chaqaloqning kindigini qo‘li bilan uzib oladi. Birov bola tug‘ilganini bilib qolmasdan bolani o‘ldirish fikri paydo bo‘ladi. Qizil rangli lozimining yarmini yirtib, mato yordamida bolani bo‘g‘ib o‘ldiradi. Keyin o‘ldirgan chaqalog‘ini suv oqizib ketishi uchun uyi yonidagi jarlikdagi ko‘lga otib yuboradi. So‘ng uyiga borib hech narsa bo‘lmaganday uxlaydi.
7-mart kuni shu mahallada yashovchi A.R. baliq ovlash maqsadida ko‘lga baliq ovlash uchun kelganida 3—4 metrlar uzoqlikdagi chaqaloq murdasini ko‘rib qoladi. Qarmoq yordamida chaqaloq murdasini tortib oladi. Chaqaloq kindigi kesilmagan, bo‘ynida bo‘g‘ib bog‘langan mato bo‘lagi bo‘lgan holatda edi. A.R. zudlik bilan tuman IIBga xabar qildi.
Surxondaryo viloyat STEBning 7-martdagi 44-sonli xulosasida, erkak jinsiga mansub chaqaloqning o‘limi bo‘yin a’zolari va yuqori nafas yo‘llarining o‘tmas yumshoq jism bilan siqilishidan keyingi mexanik asfiksiya, kindikning yo‘ldoshdan noto‘g‘ri ajratilganligi, ichki a’zolarining venoz to‘laqonligi, taloqning kamqonligi, plevra varaqlari va yurak epikardi ostiga mayda nuqtali qon quyilishlari, o‘pka va miya shishi natijasida kelib chiqqanligi ko‘rsatilgan.
O‘.B., A.B. va qizning onasi G.O. N.T. o‘g‘il farzand tug‘ib, keyin uni o‘ldirib, ko‘lga tashlab yuborganini IIBga chaqirilganidan so‘ng xabar topgan. G.O. qizi qachon va kimdan homilador bo‘lib qolganini bilmasligi, bolani dunyoga keltirib, keyin uni o‘ldirganidan ham bexabar bo‘lganini ma’lum qilgan. N.T.ning onasi qizining lozimining ikkinchi bo‘lagini tergovga taqdim qildi.
12-mart kuni IIV saytida N.T. sodir etgan jinoyat va uning qo‘lga olinganligi haqida xabar chop etildi.
Sudda N.T. sharmanda bo‘lishidan uyalib, ushbu ishni qilganligi, qilmishidan pushaymonligi va yoshini inobatga olib, qonunda belgilangan yengillik berishni so‘radi.
Sud, sudlanuvchi N.T.ga nisbatan jazo turi va miqdorini belgilashda uning aybiga iqrorligi, qilmishidan pushaymonligi, yoshini va ayol kishi ekanligi jazoni yengillashtiruvchi holatlar, jinoyat ojiz ahvoldagi shaxsga nisbatan sodir etilganligi og‘irlashtiruvchi holat deb topib, sudlanuvchining shaxsini, sodir qilgan jinoyatning ijtimoiy xavflilik darajasini va xususiyatini, jinoyatni sodir qilgunga qadar va undan keyingi xulq-atvorini hamda keng jamoatchilikning fikrlarini e’tiborga olib, unga qonun sanksiyasida ko‘rsatilgan ozodlikni cheklash jazosini tayinlashni, shuning bilan birgalikda uning zimmasiga qo‘shimcha taqiqlarni yuklashni lozim topdi.
N.T.ga sutkaning soat 18:00 dan 07:00 gacha yashash joyidan chiqishi cheklangan holda 2 (ikki) yil muddatga ozodlikni cheklash jazosi tayinlandi. Shuningdek, uning kafe, restoran va boshqa bu kabi ovqatlanish maskanlariga borishi, Qiziriq tumani hududidan chiqib ketishi, nazorat qiluvchi organning ruxsatisiz yashash va ish joylarini o‘zgartirishi taqiqlandi.
Sud hukmida hukm qonuniy kuchga kirganidan so‘ng Surxondaryo viloyat prokuraturasining depozit hisob raqamiga topshirilgan N.T.ning 6 million so‘m garov pul mablag‘lari onasiga qaytarilishi, Surxondaryo viloyat prokuraturasining ashyoviy dalilarni saqlash xonasida saqlanayotgan qizil rangli ayollar lozimining bir bo‘lagi, G.O. tomonidan taqdim etilgan ikkinchi mato bo‘lagi va xonadondan olingan ko‘rpacha tegishli tartibda yo‘q qilinishi belgilab qo‘yildi.
Izoh (0)