Axborot texnologiyalari va kommunikatsiyalarini rivojlantirish vaziri Azim Ahmadxo‘jayev raisligida vazirlik qoshida tuzilgan Axborot texnologiyalari va kommunikatsiyalarini rivojlantirish masalalari bo‘yicha jamoatchilik kengashining birinchi yig‘ilishi bo‘lib o‘tdi. Bu haqda vazirlik axborot xizmati xabar berdi.
Jamoatchilik kengashining asosiy maqsadi vazirlik oldida turgan eng muhim vazifalarni belgilash va ularni amalga oshirishda shaffoflik hamda samaradorlikni ta’minlash, shuningdek aholi va tadbirkorlik sub’ektlari bilan yaqin hamkorlikni o‘rnatish orqali vazirlik faoliyatiga nisbatan jamoatchilikning ishonchini oshirishdan iborat.
Shu bilan birga, jamoatchilik kengashi vazirlik va boshqa davlat organlari tashabbusi bilan shakllantirilayotgan me’yoriy-huquqiy hujjatlarning muhokamalarida ishtirok etishi, davlat xizmatlarini ko‘rsatish yuzasidan takliflar ishlab chiqishi, sohani rivojlantirish hamda O‘zbekiston Respublikasida yangi texnologiyalarni tatbiq qilish bo‘yicha xorijlik ekspert hamda IT-kompaniyalarni jalb qilish choralarini ko‘radi.
21 nafar a’zodan iborat kengash tarkibiga AKT sohasi konsultantlari, mobil aloqa, elektron to‘lov tizimlari, dasturiy ta’minot ishlab chiqarish va boshqa soha vakillari kiritilgan.
Dastlabki yig‘ilishida ko‘pchilik ovoz bilan Paynet va Lebazar.uz loyihalari asoschisi, tadbirkor B.Arifjanov jamoatchilik kengashining raisi etib saylandi. SAP kompaniyasining rivojlantirish bo‘yicha direktori L.Adhamova kengash raisining o‘rinbosari, vazirlikning raqamli iqtisodiyotni rivojlantirish bosh boshqarmasi boshlig‘i S.Mirahmedov kengashning mas’ul kotibi etib saylandi.
Jamoatchilik kengashining ilk yig‘ilishida 2018—2020-yillarda elektron tijoratni rivojlantirish bo‘yicha loyihalar rejasi muhokama qilindi. Kengash a’zolarining taklif va fikr-mulohazalari asosida vazifalar belgilab olindi.
Izoh (0)