Ахборот технологиялари ва коммуникацияларини ривожлантириш вазири Азим Аҳмадхўжаев раислигида вазирлик қошида тузилган Ахборот технологиялари ва коммуникацияларини ривожлантириш масалалари бўйича жамоатчилик кенгашининг биринчи йиғилиши бўлиб ўтди. Бу ҳақда вазирлик ахборот хизмати хабар берди.
Жамоатчилик кенгашининг асосий мақсади вазирлик олдида турган энг муҳим вазифаларни белгилаш ва уларни амалга оширишда шаффофлик ҳамда самарадорликни таъминлаш, шунингдек аҳоли ва тадбиркорлик субъэктлари билан яқин ҳамкорликни ўрнатиш орқали вазирлик фаолиятига нисбатан жамоатчиликнинг ишончини оширишдан иборат.
Шу билан бирга, жамоатчилик кенгаши вазирлик ва бошқа давлат органлари ташаббуси билан шакллантирилаётган меъёрий-ҳуқуқий ҳужжатларнинг муҳокамаларида иштирок этиши, давлат хизматларини кўрсатиш юзасидан таклифлар ишлаб чиқиши, соҳани ривожлантириш ҳамда Ўзбекистон Республикасида янги технологияларни татбиқ қилиш бўйича хорижлик эксперт ҳамда IT-компанияларни жалб қилиш чораларини кўради.
21 нафар аъзодан иборат кенгаш таркибига АКТ соҳаси консультантлари, мобил алоқа, электрон тўлов тизимлари, дастурий таъминот ишлаб чиқариш ва бошқа соҳа вакиллари киритилган.
Дастлабки йиғилишида кўпчилик овоз билан Paynet ва Lebazar.uz лойиҳалари асосчиси, тадбиркор Б.Арифжанов жамоатчилик кенгашининг раиси этиб сайланди. SAP компаниясининг ривожлантириш бўйича директори Л.Адҳамова кенгаш раисининг ўринбосари, вазирликнинг рақамли иқтисодиётни ривожлантириш бош бошқармаси бошлиғи С.Мираҳмедов кенгашнинг масъул котиби этиб сайланди.
Жамоатчилик кенгашининг илк йиғилишида 2018—2020 йилларда электрон тижоратни ривожлантириш бўйича лойиҳалар режаси муҳокама қилинди. Кенгаш аъзоларининг таклиф ва фикр-мулоҳазалари асосида вазифалар белгилаб олинди.
Изоҳ (0)