Shavkat Mirziyoyev Namangan shahar davlat xizmatlari markazi sharoitlari bilan tanishdi, deb xabar berdi Prezident matbuot xizmati.
Namangandagi Davlat xizmatlari markazi kuniga 800 dan ortiq shaxsga 60 ga yaqin xizmat ko‘rsatish imkoniyati yaratilgan. Bu yerda Xalq qabulxonasi, notarius, FHDYo, pasport bo‘limlari, sug‘urta, kadastr, haydovchilik guvohnomasini almashtirish, tez tibbiy yordam xizmatlari, bank shoxobchasi joylashgan.
Keluvchilar uchun tibbiyot xonasi, bolalar maydonchasi, oshxona tashkil etilgan.
Prezident aholi va tadbirkorlarga ko‘rsatiladigan xizmatlar turlari, sifati va tezkorligi bilan qiziqdi. Haydovchilik guvohnomasini almashtirish jarayonini ko‘zdan kechirdi.
Muassasa xodimlari bilan muloqotda xizmat turlarini yanada ko‘paytirish, aholining internet xizmatlaridan foydalanish darajasini oshirish zarurligi ta’kidlandi.
“Bu tizimdan eng katta maqsad — odamlarning og‘irini yengil qilish. Hamma hududlarni va xizmatlarni shu tizimga qamrab olsak, sarsonchilik, adolatsizlik, korrupsiya bo‘lmaydi”, — dedi Shavkat Mirziyoyev.
O‘zbekiston Prezidenti ushbu markaz binosida joylashgan “Oila” ilmiy-amaliy tadqiqot markazi viloyat bo‘limi hamda Namangan innovatsiya markazi faoliyati bilan ham tanishdi.
Eslatib o‘tamiz, Shavkat Mirziyoyevning 2017-yil 12 dekabrdagi “Aholiga davlat xizmatlari ko‘rsatishning milliy tizimini tubdan isloh qilish chora-tadbirlari to‘g‘risida”gi farmoniga muvofiq Adliya vazirligi huzurida Davlat xizmatlari agentligi, shahar va tumanlarda uning markazlari tashkil etilgan edi.
Mavzuga doir: To‘raqo‘rg‘ondagi Ibrat maktabini a’lo baholarga bitirgan yoshlar oliy o‘quv yurtiga imtihonsiz kiradi
Izoh (0)