Jahonning 70 mamlakatiga parvozlar, har soatlik poyezd qatnovlari: Turizm qo‘mitasi ba’zi rejalarni e’lon qildi

Turkiya prezidenti Rajab Toyyib Erdo‘g‘onning O‘zbekistonga tashrifi doirasida, 30-aprel kuni Toshkentdagi Wyndham mehmonxonasida O‘zbekiston Turizmni rivojlantirish davlat qo‘mitasi tomonidan turkiyalik jurnalistlar uchun brifing o‘tkazildi. Tadbir davomida sohani rivojlantirish doirasida amalga oshirilishi rejalashtirilayotgan bir qator tashabbuslar haqida axborot berildi.

Hozirgi kunda “Afrosiyob” tezyurar poyezdlari Toshkent shahridan Samarqand, Buxoro, Qarshi va Navoiy shaharlariga qatnamoqda. 1-avgustdan Shahrisabz shahriga, 2018-yil oxirigacha esa Xiva shahriga qatnovlarni yo‘lga qo‘yish ko‘zda tutilgan.

“Afrosiyob” poyezdlari Toshkentdan Samarqandga juma, shanba va yakshanba kunlari to‘rt mahal, qolgan kunlar esa uch mahal qatnaydi. Qarshi shahriga har kuni bir mahal, Buxoro va Navoiyga esa ikki mahaldan qatnamoqda.

Turizm sohasi taraqqiy etgan mamlakatlarda asosiy turistik yo‘nalishlar bo‘yicha tezyurar poyezdar har 10 daqiqada qatnashi ham kuzatiladi. Turizmni rivojlantirish davlat qo‘mitasi vakili Mirtolib Mirzohidov Toshkent shahridan O‘zbekistonning asosiy sayyohlik nuqtalariga “Afrosiyob” kabi tezyurar poyezdlar qatnovlarini har 10 daqiqada bo‘lmasa ham, kuniga har bir yoki har ikki soatda amalga oshirish maqsad qilinganini aytib o‘tdi.

Temiryo‘l bilan bir qatorda havo havo yo‘llari sohasida ham rejalar ulkan. Hozirgi vaqtda “O‘zbekiston havo yo‘llari” milliy aviakompaniyasi O‘zbekistonni jahonning 40 dan ortiq shaharlari bilan bog‘lamoqda. Ayni vaqtda dunyoning 16 mamlakati fuqarolari O‘zbekistonga vizasiz kirishlari, yana 51 mamlakat fuqarolari esa O‘zbekistonga kirish vizalarini soddalashtirilgan tartibda olishlari mumkin.

“Shundan kelib chiqib, parvozlar geografiyasini hozirgi 40 shahardan qariyb 70 mamlakatgacha kengaytirish maqsadi bor”, — dedi Mirtolib Mirzohidov. Bunda qo‘mita vakillari hozirgi 40 shahar orasida bir mamlakatning bir necha shaharlari borligiga, 70 mamlakatlik qamrov esa juda katta bo‘lishiga e’tibor qaratdi. Shu jihatdan qo‘mita raisi o‘rinbosari Shohrux Sharahmetovning turk loukosterlarini O‘zbekiston bilan hamkorlik qilishga chorlagani ayni muddao.

Shohrux Sharahmetov turk jurnalistlarining bu rejalarning bajarilish muddatlari haqidagi savoliga javob berarkan, Prezident Shavkat Mirziyoyev turizm sohasi mas’ullaridan yangiliklar, o‘zgarishlarni har kuni amalga oshirishni talab qilayotgani, shu boisdan qo‘mitaning “rejalari yillar bilan emas, kunlar bilan o‘lchanayotgani”ni e’tirof etib o‘tdi. Qo‘mitada ishlab chiqilayotgan reja va loyihalarda turkiyadan jalb etilgan maslahatchining ham o‘rni katta ekani alohida qayd etildi.

2017-yilning noyabrida turkiyalik Sodiq Badak O‘zbekiston Turizmni rivojlantirish davlat qo‘mitasi raisi maslahatchisi etib tayinlangan edi. Turkiya Milliy assambleyasi sobiq deputati hisoblangan janob Badak o‘z mamlakatida turizmni rivojlantirish bo‘yicha 30 yillik tajribaga ega. Uning maslahatchi lavozimidagi vazifalari ro‘yxatida O‘zbekiston sayyohlik salohiyatini rivojlantirishning o‘rta (5 yillik) va uzoq (10 yillik) muddatli strategiyalarini ishlab chiqishda o‘zbek mutaxassislariga ko‘mak ko‘rsatish ham bor edi.

“Turkiyalik maslahatchi Sodiq Badakning O‘zbekistonda turizmni rivojlantirish bo‘yicha loyihasi yaqin 2—3 oy ichida taqdim etilishi kutilmoqda”, — deya qo‘shimcha qildi Shohrux Sharahmetov.