Туркия президенти Ражаб Тоййиб Эрдўғоннинг Ўзбекистонга ташрифи доирасида, 30 апрель куни Тошкентдаги Wyndham меҳмонхонасида Ўзбекистон Туризмни ривожлантириш давлат қўмитаси томонидан туркиялик журналистлар учун брифинг ўтказилди. Тадбир давомида соҳани ривожлантириш доирасида амалга оширилиши режалаштирилаётган бир қатор ташаббуслар ҳақида ахборот берилди.
Ҳозирги кунда «Афросиёб» тезюрар поездлари Тошкент шаҳридан Самарқанд, Бухоро, Қарши ва Навоий шаҳарларига қатнамоқда. 1 августдан Шаҳрисабз шаҳрига, 2018 йил охиригача эса Хива шаҳрига қатновларни йўлга қўйиш кўзда тутилган.
«Афросиёб» поездлари Тошкентдан Самарқандга жума, шанба ва якшанба кунлари тўрт маҳал, қолган кунлар эса уч маҳал қатнайди. Қарши шаҳрига ҳар куни бир маҳал, Бухоро ва Навоийга эса икки маҳалдан қатнамоқда.
Туризм соҳаси тараққий этган мамлакатларда асосий туристик йўналишлар бўйича тезюрар поездар ҳар 10 дақиқада қатнаши ҳам кузатилади. Туризмни ривожлантириш давлат қўмитаси вакили Миртолиб Мирзоҳидов Тошкент шаҳридан Ўзбекистоннинг асосий сайёҳлик нуқталарига «Афросиёб» каби тезюрар поездлар қатновларини ҳар 10 дақиқада бўлмаса ҳам, кунига ҳар бир ёки ҳар икки соатда амалга ошириш мақсад қилинганини айтиб ўтди.
Темирйўл билан бир қаторда ҳаво ҳаво йўллари соҳасида ҳам режалар улкан. Ҳозирги вақтда «Ўзбекистон ҳаво йўллари» миллий авиакомпанияси Ўзбекистонни жаҳоннинг 40 дан ортиқ шаҳарлари билан боғламоқда. Айни вақтда дунёнинг 16 мамлакати фуқаролари Ўзбекистонга визасиз киришлари, яна 51 мамлакат фуқаролари эса Ўзбекистонга кириш визаларини соддалаштирилган тартибда олишлари мумкин.
«Шундан келиб чиқиб, парвозлар географиясини ҳозирги 40 шаҳардан қарийб 70 мамлакатгача кенгайтириш мақсади бор», — деди Миртолиб Мирзоҳидов. Бунда қўмита вакиллари ҳозирги 40 шаҳар орасида бир мамлакатнинг бир неча шаҳарлари борлигига, 70 мамлакатлик қамров эса жуда катта бўлишига эътибор қаратди. Шу жиҳатдан қўмита раиси ўринбосари Шоҳрух Шараҳметовнинг турк лоукостерларини Ўзбекистон билан ҳамкорлик қилишга чорлагани айни муддао.
Шоҳрух Шараҳметов турк журналистларининг бу режаларнинг бажарилиш муддатлари ҳақидаги саволига жавоб бераркан, Президент Шавкат Мирзиёев туризм соҳаси масъулларидан янгиликлар, ўзгаришларни ҳар куни амалга оширишни талаб қилаётгани, шу боисдан қўмитанинг «режалари йиллар билан эмас, кунлар билан ўлчанаётгани»ни эътироф этиб ўтди. Қўмитада ишлаб чиқилаётган режа ва лойиҳаларда туркиядан жалб этилган маслаҳатчининг ҳам ўрни катта экани алоҳида қайд этилди.
2017 йилнинг ноябрида туркиялик Содиқ Бадак Ўзбекистон Туризмни ривожлантириш давлат қўмитаси раиси маслаҳатчиси этиб тайинланган эди. Туркия Миллий ассамблеяси собиқ депутати ҳисобланган жаноб Бадак ўз мамлакатида туризмни ривожлантириш бўйича 30 йиллик тажрибага эга. Унинг маслаҳатчи лавозимидаги вазифалари рўйхатида Ўзбекистон сайёҳлик салоҳиятини ривожлантиришнинг ўрта (5 йиллик) ва узоқ (10 йиллик) муддатли стратегияларини ишлаб чиқишда ўзбек мутахассисларига кўмак кўрсатиш ҳам бор эди.
«Туркиялик маслаҳатчи Содиқ Бадакнинг Ўзбекистонда туризмни ривожлантириш бўйича лойиҳаси яқин 2—3 ой ичида тақдим этилиши кутилмоқда», — дея қўшимча қилди Шоҳрух Шараҳметов.
Брифинг давомида қўмита вакиллари Туркия томонини Ўзбекистон туризм соҳасига фаол инвестиция киритишга чақирди, хусусан, Ўзбекистоннинг ҳар бир вилоятда янги меҳмонхоналар қуриш учун ҳокимлар томонидан хорижий инвесторлар учун 20 тадан ер участкалари ажратиб берилаётгани маълум қилинди.
Изоҳ (0)