Karmanadagi bazm vaqti Rossiyadagi xafagarchilik eslandi. So‘ng bir kishi halok bo‘ldi (video)

Navoiy viloyati Karmana tumanida yashovchi fuqaro ham ichkilik oqibatida o‘z do‘stining qotiliga aylandi, deya xabar bermoqda “O‘zbekiston 24” telekanalining “Tezkor xabarlar” dasturi.

Karmana tumani Kamolot mahallasidagi xonadonida Zafar Ergashev do‘stlari bilan yig‘ilishib, spirtli ichimliklar iste’mol qilib, bazmu jamshid uyushtirishadi. Quyuq o‘tirishning so‘ngida ikki kishi — xonadon egasi Zafar Ergashev va uning tanishi Abdumalik Yorqulov qolishadi.

Mast holda Zafar Ergashev eski ginalarni eslab, o‘rtog‘i Abdumalikka Rossiyaga ishlashga borishganida uni yolg‘iz tashlab ketganini aytib, janjal ko‘taradi. Janjal mushtlashuvga aylanadi. Zafar dasturxon yonida turgan oshxona pichog‘ini olib, Abdumalikka tiqib oladi. Bu ham yetmagandek, uning boshiga gultuvak bilan urib, o‘ldirib qo‘yadi.

“Tezkor xabarlar” dasturida o‘qib eshittirilgan matndan