Juma namozi paytida O‘zbekistonning barcha hududlarida, ayniqsa, katta ko‘chalarda tirbandliklarning kuchayib ketayotgani — bor holat, deya xabar bermoqda “Yoshlar” telekanalining “Davr” informatsion dasturi.
“Biz bunday jarayonga Toshkent shahridagi Shayx Zayniddin jome’si — xalq tilida Ko‘kcha deb ataladigan masjid yonidagi yo‘l va unga tutash chorrahada guvoh bo‘ldik. Haftaning har juma kuni mazkur hududda soat 12:00 dan boshlab mashina yig‘iladi...Biroq, juma namozi o‘qiladigan 13:00 dan 13:30 gacha bo‘lgan vaqt oralig‘ida masjid atrofida transport vositasida harakatlanish juda qiyinlashadi”, — deydi telekanal muxbiri.
Muxbirlar masjid yaqinida xizmat o‘tayotgan yo‘l nazoratchilarining fikri bilan ham qiziqqan. Ulardan biri: “Aslida haqqim bo‘lsa ham, ibodatga to‘sqinlik qilayotgandek bo‘lmay deb, qonuniy chora ko‘rmayman”, — deb aytgan. Lavha davomida namozdan avvalroq ichkari turargohga qo‘yib, so‘ng mashinalar qurshovida qolib ketgan chorasiz haydovchi ham ko‘rsatilgan.
“Huvaydo” jome’ masjidi imom-xatibi Murodilla Xushnazarovning so‘zlariga ko‘ra, mashinalarni boshqalar o‘tadigan joyda qoldirib ketish birovning haqini yeyish bilan teng.
Mashinani uzoqroqda qoldirib, namozga piyoda kelsa, buning savobi ortiq bo‘ladi. Masjidga piyoda kelayotganlarning har bir qadamiga farishtalar savob yozar ekan. Payg‘ambarimiz (s.a.v.)ning “Birinchi qadami bilan o‘tgan gunohlariga mag‘firat bo‘ladi, ikkinchi qadami bilan Allohning huzuridagi martabasi yuqori bo‘ladi”, degan va’dalari bor.“Davr” muxbiri lavha davomida, jumladan, shunday deydi: “To‘rt muchasi sog‘ bo‘lgan yosh yigitlar ham imkon darajasida masjidning eshigigacha mashinada kelishga urinadi. Ularning bu harakatlari bir bemorga tez yordam, bir yong‘inga ko‘mak kechikishiga sabab bo‘lishi mumkin. Buning gunohi esa istab kelgan savobimizdan kam bo‘lmasa kerak”.Murodilla Xushnazarov, “Xuvaydo” jome’ masjidi imom-xatibi
Qayd etish joiz, “Davr”ning lavhasida aksariyat masjidlar atrofida avtoturargohlar nazarda tutilmagani, avtoturargohi borlarida ham sig‘im nisbatan kichikligi masalasida biror fikr yo taklif bildirilmagan.
Izoh (0)