Turkmaniston Prezidenti Gurbanguli Berdimuhamedovning O‘zbekistonga davlat tashrifi doirasida Toshkentda Turkmaniston milliy ko‘rgazmasi bo‘lib o‘tmoqda. Bu haqda O‘zA xabar berdi.
Unda qo‘shni davlatning yetakchi korxonalari, kompaniya va tashkilotlari, yirik tadbirkorlik subyektlari ishtirok etib, milliy mahsulotlar, iqtisodiyot sohasidagi ilg‘or texnologiyalar, xizmatlarni namoyish etmoqda.
O‘zbekiston Prezidenti Shavkat Mirziyoyev Turkmaniston milliy ko‘rgazmasi ishtirokchilari va mehmonlariga qutlov yo‘lladi. Ko‘rgazmaning ochilish marosimida Prezident qutlovini O‘zbekiston Bosh vazirining o‘rinbosari N.Otajonov o‘qib eshittirdi.
Turkmaniston tashqi iqtisodiy aloqalar va savdo vaziri D.O‘rozmurodov turkmanistonlik ishbilarmonlar uchun O‘zbekiston muhim savdo-iqtisodiy hudud ekani, Buyuk ipak yo‘lining savdo-sotiq rivojlangan manzilida joylashgan mamlakatlar tadbirkorlari hamkorligining mustahkamlanib borayotgani esa teng manfaatli rivojlanishda muhim ahamiyat kasb etishini qayd etdi.
Turkmaniston milliy ko‘rgazmasida neft va kimyo, to‘qimachilik, tibbiyot sanoati, qishloq xo‘jaligi va oziq-ovqat mahsulotlari, qurilish mollari, transport va logistika, sport va turizm, ilmiy-texnika, ta’lim sohasidagi yutuqlar, xizmatlar namoyish etilmoqda.
Turkman gilamlari, kasanachilik, baliqchilik sanoati, dunyoga mashhur axaltekin otlari naslchiligi tadqiqotlari katta qiziqish uyg‘otmoqda.
Izoh (0)