Туркманистон Президенти Гурбангули Бердимуҳамедовнинг Ўзбекистонга давлат ташрифи доирасида Тошкентда Туркманистон миллий кўргазмаси бўлиб ўтмоқда. Бу ҳақда ЎзА хабар берди.
Унда қўшни давлатнинг етакчи корхоналари, компания ва ташкилотлари, йирик тадбиркорлик субъектлари иштирок этиб, миллий маҳсулотлар, иқтисодиёт соҳасидаги илғор технологиялар, хизматларни намойиш этмоқда.
Ўзбекистон Президенти Шавкат Мирзиёев Туркманистон миллий кўргазмаси иштирокчилари ва меҳмонларига қутлов йўллади. Кўргазманинг очилиш маросимида Президент қутловини Ўзбекистон Бош вазирининг ўринбосари Н.Отажонов ўқиб эшиттирди.
Туркманистон ташқи иқтисодий алоқалар ва савдо вазири Д.Ўрозмуродов туркманистонлик ишбилармонлар учун Ўзбекистон муҳим савдо-иқтисодий ҳудуд экани, Буюк ипак йўлининг савдо-сотиқ ривожланган манзилида жойлашган мамлакатлар тадбиркорлари ҳамкорлигининг мустаҳкамланиб бораётгани эса тенг манфаатли ривожланишда муҳим аҳамият касб этишини қайд этди.
Туркманистон миллий кўргазмасида нефть ва кимё, тўқимачилик, тиббиёт саноати, қишлоқ хўжалиги ва озиқ-овқат маҳсулотлари, қурилиш моллари, транспорт ва логистика, спорт ва туризм, илмий-техника, таълим соҳасидаги ютуқлар, хизматлар намойиш этилмоқда.
Туркман гиламлари, касаначилик, балиқчилик саноати, дунёга машҳур ахалтекин отлари наслчилиги тадқиқотлари катта қизиқиш уйғотмоқда.
Изоҳ (0)