Mudofaa vazirligiga qarashli harbiy qism ofitser va askarlari Toshkent shahri Mirobod tumani Oltinko‘l mahallasida istiqomat qiluvchi 94 yoshli Abdulla ota Taziyev xonadonida hashar o‘tkazdi. Bu haqda vazirlik matbuot xizmati xabar qildi.
Abdulla Taziyev urushga safarbar etilganda 17 yoshda bo‘lgan. Urush faxriysi Ukrainaning Xarkov, Poltova, Kremenchug shaharlarida, Rossiyaning Voronej shahrida, Serbiya poytaxti Belgraddagi janglarda tengsiz jasorat ko‘rsatib, askar unvonidan katta leytenant unvonigacha, o‘qchi lavozimidan vzvod komandiri lavozimigacha bo‘lgan yo‘lni bosib o‘tdi. Urush tugagach, 50 yildan oshiqroq vaqt mobaynida ta’lim muassasalarida jismoniy tayyorgarlik fanidan dars berdi.
“Ofitser va askarlar urush faxriysi bilan suhbatlashar ekan, urush dahshatlari, raketa-yu snaryadlar ostida qolib, vayronaga aylangan shahar-qishloqlar ko‘z oldida gavdalandi. Bugungi tinch va farovon kunlar katta yo‘qotish va qiyinchilik evaziga kelganligiga yana bir bor amin bo‘lishdi”, — deyiladi vazirlik xabarida.
Askar mehmonlar xonadon egasining uy-xo‘jalik ishlariga yordam berdi. Tunuka ayvon bo‘yaldi. Tomorqa yer o‘t-o‘lanlardan tozalandi. Daraxtlar butalib, devorlar oqlandi. Qisqa fursat ichida yon-atrof saranjom-sarishta bo‘ldi. Harbiy qism komandirining o‘rinbosari mayor Aziz Ravshanov urush faxriysi Abdulla otani 9 may – “Xotira va Qadrlash kuni” munosabati bilan yaqin kunlarda harbiy qismda tashkil etiladigan bayramona konsert dasturiga taklif etdi.
Izoh (0)