Shavkat Mirziyoyev — samarqandlik o‘qituvchining o‘limi haqida: “Yuragimda bu xuddiki men tufayli yuz bergandek tuyuldi”

O‘zbekiston Prezidenti Shavkat Mirziyoyevning Sirdaryo viloyatiga tashrifi doirasida 13-aprel kuni Sayxunobod tumanida faollar yig‘ilishi bo‘lib o‘tgan. “Kun.uz”ning ushbu yig‘ilishda qatnashgan muxbirga asoslanib xabar berishicha, Prezident yig‘ilishdagi nutqi davomida uning Samarqand viloyatiga tashrifi arafasida Kattaqo‘rg‘on tumanidagi yo‘l tozalash ishlariga jalb etilgan 23 yoshli o‘qituvchi — Diana Yenikeyevaning o‘limiga munosabat bildirgan.

Men samarqandlik o‘qituvchining vafoti haqida eshitdim. Qanaqadir direktor, rahbar yoki hokim qachondir “mehmon” keladi, deb ikki-uch kun oldin aytgan. Lekin, mening yuragimda bu xuddiki, men tufayli yuz bergandek tuyuldi.

Yana bir bora va so‘nggi marta barcha rahbarlarni alohida ogohlantiraman: bundan buyon bironta hududda o‘qituvchi, shifokor yoki talabalar obodonlashtirishga jalb etilsa, jazo juda qattiq bo‘ladi. Ishdan olish bilan birga o‘sha rahbar qilmishi uchun qonun oldida javobgar bo‘ladi.

Menga farqi yo‘q, juda katta xizmat qilgan hokim bo‘lsa ham, u ishdan ketadi. Men buni aytishga majburman, chunki bu davom etmoqda.

Shavkat Mirziyoyev, O‘zbekiston Prezidenti

Eslatib o‘tamiz, 14-mart kuni, O‘zbekiston Prezidentining Samarqand viloyatiga tashrifi arafasida, Kattaqo‘rg‘on tumanida ko‘cha tozalash ishlariga jalb qilingan 23 yoshli o‘qituvchi Diana Yenikeyeva katta yo‘ldagi to‘siqlarni oqlash chog‘ida avtohalokat oqibatida vafot etgandi — uni KAMAZ yuk mashinasi urib ketgan.

Hodisa munosabati bilan Kattaqo‘rg‘on tumani hokimi o‘rinbosari M.Muzaffarov va Samarqand viloyati xalq ta’limi boshqarmasi boshlig‘i o‘rinbosari Q.Saidov bergan qo‘shma bayonotda “o‘rganishlar natijasida maktab o‘qituvchilari, jumladan, Diana Yenikeyeva ham hech qanday yo‘l chetini tozalash, supurish uchun chiqarilmagani”ni aytildi.

Keyinroq Samarqand viloyati hokimi Turobjon Jo‘rayev ushbu “baxtsiz hodisani Davlat rahbarining viloyatga tashrifi bilan bog‘lab, OAVda turli xabarlar va munosabatlar bildirilayotgani”ni “noxolis talqin” deb atab, bunday xabarlarni “haqiqiy mos kelmaydi” deb ta’kidlagan edi. Hokim o‘z bayonotida ijtimoiy soha xodimlari mahalliy hokimlik organlari tomonidan hududlarni obodonlashtirishga chiqarilmagani va bundan keyin ham chiqarilmasligini ta’kidlagan edi.

Kuni kecha esa Kattaqo‘rg‘on tuman prokuraturasi Prezidentning Samarqand viloyatiga tashrifi arafasida mahalliy o‘qituvchilar obodonlashtirish ishlariga jalb qilinganini tan oldi. Tuman prokuraturasi bergan bayonotga ko‘ra, “obodonlashtirish ishlarini o‘tkazishda tegishli choralarni ko‘rmaganligi uchun 29-mart kuni xalq ta’limi vazirining buyrug‘iga binoan tuman xalq ta’limi bo‘limi mudiri A.Jumanazarov ishdan olingan.