O‘zbekiston va Tojikiston strategik hamkorlik haqidagi bitimni tayyorlamoqda. Bu haqda Tojikiston parlamenti quyi palatasi spikeri Shukurjon Zuhurov 12-aprel, juma kuni Sankt-Peterburgda jurnalistlarga ma’lum qildi, deya xabar beradi Sputnik.
“Hozir Tojikiston va O‘zbekiston o‘rtasida strategik hamkorlik to‘g‘risida bitim tayyorlanmoqda”, — deb ta’kidladi u.
Zuhurov ushbu hujjat Emomali Rahmonning Toshkentga tashrifi davomida imzolanishi mumkinligini bildirdi.
“Biz qo‘shni bo‘lgan davlatlarmiz, qo‘shnilar tanlanmaydi. O‘zbekiston bilan har doim yaxshi munosabatlarga ega bo‘lishni istaganmiz. Afsuski, oxirgi o‘n yillikda bu amalga oshirilmadi”, — dedi Tojikiston parlament vakili.
Zuhurov ikki davlat o‘rtasida aloqalar so‘ngi bir yarim yil ichida, xususan, ikki davlat rahbarlarining muntazam uchrashuvlari natijasida yaxshilanayotganligini ta’kidlab o‘tdi.
Izoh (0)