Andijon viloyati Bo‘z tumanida yong‘in o‘chirish qismining yangi binosi foydalanishga topshirildi. Bu haqda “Daryo”ga viloyat IIB YXB matbuot xizmati xabar berdi.
Hukumatning yong‘in xavfsizligi tizimiga qaratayotgan e’tibori tufayli tuman markazida ushbu xizmat uchun barcha qulayliklarga ega, bugungi kun talablariga to‘la mos tushadigan zamonaviy bino qurib berildi. Inshoot yong‘in o‘chirish texnikasi, jangovar shay holatda turadigan maxsus boks, yangi rusumdagi o‘t o‘chirish anjomlariga ega. Yong‘in xavfsizligi bo‘linmasi va qism boshlig‘i, inspektorlar uchun alohida xonalar ajratilgan. Navbatchilik qismi zamonaviy aloqa vositalari va videokuzatuv bilan ta’minlangan.Andijon viloyat IIB YXB
Inshootning ochilish marosimi katta tantana bilan bo‘lib o‘tdi. Unda bo‘linma va qism, viloyat, tuman ichki ishlar, yong‘in xavfsizligi idoralari rahbar xodimlari, tizimda uzoq yillar ishlagan faxriylar, davlat va jamoat tashkilotlari vakillari, quruvchilar ishtirok etdi. Inshootni barpo qilgan binokorlar hamda yong‘in o‘chirish qismida fidokorona mehnat qilayotganlarga “Tashakkurnoma” va qimmatbaho esdalik sovg‘alari topshirildi. Ramziy kalit bino egasiga topshirilganidan keyin barcha mehmonlar inshootni aylanish uchun taklif etildi.
Inshootda navbatchilikda qoladiganlar uchun yotoqxona va oshxona joylashgan. Kasbiy va jangovar tayyorgarligini oshirish uchun ham maxsus xonalar bo‘lib, talab darajasida jihozlangan. Kutubxona, ma’naviyat va ma’rifat xonalari ham kerakli adabiyotlar, o‘quv uslubiy qo‘llanmalar bilan ta’minlangan.
Tumandagi yong‘in o‘chirish qismi 1963-yilda tashkil etilib, “xo‘jaliklararo o‘t o‘chirish qismi” deb atalgan. O‘sha davrda o‘t o‘chirish qismi tasarrufida “ZIL-157” rusumli avtomobil bo‘lgan. 1976-yilda yo‘l qurilish boshqarmasi hududiga ko‘chirilib, yana bitta o‘t o‘chirish avtomobili berilgan. 1985-yili sobiq 1-qurilish tashkiloti binosiga o‘tilganidan so‘ng uni o‘t o‘chirish qismi shaxsiy tarkibi o‘z kuchi bilan ta’mirdan chiqargan.
Tuman ichki ishlar bo‘limi yong‘in xavfsizligi bo‘linmasi hamda 18-kasbiylashgan yong‘in o‘chirish qismining shu kunga qadar joylashgan binosi yaroqsiz holatga kelib, bugungi kun talabiga javob bermay qolgan edi.
Izoh (0)