Шавкат Мирзиёев — самарқандлик ўқитувчининг ўлими ҳақида: «Юрагимда бу худдики мен туфайли юз бергандек туюлди»

Ўзбекистон Президенти Шавкат Мирзиёевнинг Сирдарё вилоятига ташрифи доирасида 13 апрель куни Сайхунобод туманида фаоллар йиғилиши бўлиб ўтган. «Kun.uz»нинг ушбу йиғилишда қатнашган мухбирга асосланиб хабар беришича, Президент йиғилишдаги нутқи давомида унинг Самарқанд вилоятига ташрифи арафасида Каттақўрғон туманидаги йўл тозалаш ишларига жалб этилган 23 ёшли ўқитувчи — Диана Еникееванинг ўлимига муносабат билдирган.

Мен самарқандлик ўқитувчининг вафоти ҳақида эшитдим. Қанақадир директор, раҳбар ёки ҳоким қачондир «меҳмон» келади, деб икки-уч кун олдин айтган. Лекин, менинг юрагимда бу худдики, мен туфайли юз бергандек туюлди.

Яна бир бора ва сўнгги марта барча раҳбарларни алоҳида огоҳлантираман: бундан буён биронта ҳудудда ўқитувчи, шифокор ёки талабалар ободонлаштиришга жалб этилса, жазо жуда қаттиқ бўлади. Ишдан олиш билан бирга ўша раҳбар қилмиши учун қонун олдида жавобгар бўлади.

Менга фарқи йўқ, жуда катта хизмат қилган ҳоким бўлса ҳам, у ишдан кетади. Мен буни айтишга мажбурман, чунки бу давом этмоқда.

Шавкат Мирзиёев, Ўзбекистон Президенти

Эслатиб ўтамиз, 14 март куни, Ўзбекистон Президентининг Самарқанд вилоятига ташрифи арафасида, Каттақўрғон туманида кўча тозалаш ишларига жалб қилинган 23 ёшли ўқитувчи Диана Еникеева катта йўлдаги тўсиқларни оқлаш чоғида автоҳалокат оқибатида вафот этганди — уни КАМАЗ юк машинаси уриб кетган.

Ҳодиса муносабати билан Каттақўрғон тумани ҳокими ўринбосари М.Музаффаров ва Самарқанд вилояти халқ таълими бошқармаси бошлиғи ўринбосари Қ.Саидов берган қўшма баёнотда «ўрганишлар натижасида мактаб ўқитувчилари, жумладан, Диана Еникеева ҳам ҳеч қандай йўл четини тозалаш, супуриш учун чиқарилмагани»ни айтилди.

Кейинроқ Самарқанд вилояти ҳокими Туробжон Жўраев ушбу «бахтсиз ҳодисани Давлат раҳбарининг вилоятга ташрифи билан боғлаб, ОАВда турли хабарлар ва муносабатлар билдирилаётгани»ни «нохолис талқин» деб атаб, бундай хабарларни «ҳақиқий мос келмайди» деб таъкидлаган эди. Ҳоким ўз баёнотида ижтимоий соҳа ходимлари маҳаллий ҳокимлик органлари томонидан ҳудудларни ободонлаштиришга чиқарилмагани ва бундан кейин ҳам чиқарилмаслигини таъкидлаган эди.

Куни кеча эса Каттақўрғон туман прокуратураси Президентнинг Самарқанд вилоятига ташрифи арафасида маҳаллий ўқитувчилар ободонлаштириш ишларига жалб қилинганини тан олди. Туман прокуратураси берган баёнотга кўра, «ободонлаштириш ишларини ўтказишда тегишли чораларни кўрмаганлиги учун 29 март куни халқ таълими вазирининг буйруғига биноан туман халқ таълими бўлими мудири А.Жуманазаров ишдан олинган.