“Tadbirkorlik faoliyati sohasidagi litsenziyalash va ruxsat berish tartib-taomillarini yanada qisqartirish va soddalashtirish, shuningdek biznes yuritish sharoitlarini yaxshilash chora-tadbirlari to‘g‘risida”gi Prezident farmoniga ko‘ra, 2018-yil 1-iyundan yengil avtomobilga ega bo‘lgan jismoniy shaxslarga yakka tartibdagi tadbirkor shaklida yo‘nalishli taksi sifatida yo‘lovchilarni tijorat asosida tashish huquqi beriladi. Spot bu borada ushbu biznes vakillarining fikrlari bilan qiziqdi.
Akmal Payziyev, MyTaxi.uz asoschisi va rahbari:
Bugungi kunda O‘zbekiston bo‘yicha yo‘nalishsiz taksilarga 4000 ga yaqin litsenziya berilgan. Qariyb 70 mingta mashina O‘zbekiston yo‘llarida taksilik qilmoqda. Ularning 94,3 foizi litsenziyaga ega emas. 4000 ta mashina yiliga 2,7 milliard so‘m soliq to‘laydi.Patentli tizimga o‘tganda davlat 70 ming haydovchidan (EKOIHning 1 barobarida) yiliga 43 trillion so‘m (159 000 foizga ko‘p) oladi. Bu o‘n minglab yangi ish o‘rinlari demakdir.
Barcha haydovchilar UzCard kartalarini Click va Payme tizimlari orqali jon deb qabul qilishni boshlardi. Xususiy taksilarni texnologiyalar orqali nazorat qilish mumkin. Bizni chaqirishsin, buni qanday qilishni ko‘rsatamiz.
Rustam Shomurodov, Taxi.uz asoschisi va rahbari:
Patent asosidagi taksi faoliyati ishsizlikni kamaytirish va pensiyalar miqdorini oshirish imkonini beradi. Hozirda noqonuniy taksistlarning katta guruhi ijtimoiy himoyalanmagan.Agar sektor soyadan chiqsa, sobiq noqonuniy taksichilar tibbiy ko‘rikdan, ularning avtomobillari esa texnik ko‘rikdan o‘tadi, bu yo‘lovchilar xavfsizligi foydasiga ishlaydi.
Umuman olganda, xizmat ko‘rsatish sifati yaxshilanadi, servis, shu jumladan, sayyohlar uchun jozibaliroq bo‘ladi. Safar narxi qat’iy belgilanadi. Soha ko‘tarilishni boshlaydi.
Musheg Saakyan, “Yandeks.Taksi” xalqaro rivojlanish bo‘yicha direktori:
Bizning fikrimizcha, bu mamlakatda tashuvlar bozorini ancha yaxshilaydigan muhim va o‘z vaqtidagi qaror.Hozir taksi xizmatini ko‘rsatish uchun litsenziya faqat taksoparklarga beriladi. Xususiy haydovchi qonuniy yo‘l bilan taksichilik qilmoqchi bo‘lsa, dastlab mashinasini taksoparkka ijaraga berishi, so‘ng o‘z mashinasida odam tashish uchun taksopark bilan mehnat shartnomasini tuzishi kerak. Tabiiyki, ko‘pchilik haydovchilar bunday ovoragarchilikdan voz kechadi.
Yangi qarordan davlat ham, taksoparklar ham, “Yandeks.Taksi” kabi agregatorlar ham — hamma yutadi.
Biz uchun esa qaror yakka tadbirkor sifatida ro‘yxatdan o‘tgan haydovchilarga va “Yandeks.Taksi” orqali buyurtmalar olishni istovchilarga sheriklarimiz orqali tizimga ulanish ancha osonlashishini bildiradi.
Izoh (0)