«Тадбиркорлик фаолияти соҳасидаги лицензиялаш ва рухсат бериш тартиб-таомилларини янада қисқартириш ва соддалаштириш, шунингдек бизнес юритиш шароитларини яхшилаш чора-тадбирлари тўғрисида»ги Президент фармонига кўра, 2018 йил 1 июндан енгил автомобилга эга бўлган жисмоний шахсларга якка тартибдаги тадбиркор шаклида йўналишли такси сифатида йўловчиларни тижорат асосида ташиш ҳуқуқи берилади. Spot бу борада ушбу бизнес вакилларининг фикрлари билан қизиқди.
Акмал Пайзиев, MyTaxi.uz асосчиси ва раҳбари:
Бугунги кунда Ўзбекистон бўйича йўналишсиз таксиларга 4000 га яқин лицензия берилган. Қарийб 70 мингта машина Ўзбекистон йўлларида таксилик қилмоқда. Уларнинг 94,3 фоизи лицензияга эга эмас. 4000 та машина йилига 2,7 миллиард сўм солиқ тўлайди.Патентли тизимга ўтганда давлат 70 минг ҳайдовчидан (ЭКОИҲнинг 1 баробарида) йилига 43 триллион сўм (159 000 фоизга кўп) олади. Бу ўн минглаб янги иш ўринлари демакдир.
Барча ҳайдовчилар UzCard карталарини Click ва Payme тизимлари орқали жон деб қабул қилишни бошларди. Хусусий таксиларни технологиялар орқали назорат қилиш мумкин. Бизни чақиришсин, буни қандай қилишни кўрсатамиз.
Рустам Шомуродов, Taxi.uz асосчиси ва раҳбари:
Патент асосидаги такси фаолияти ишсизликни камайтириш ва пенсиялар миқдорини ошириш имконини беради. Ҳозирда ноқонуний таксистларнинг катта гуруҳи ижтимоий ҳимояланмаган.Агар сектор соядан чиқса, собиқ ноқонуний таксичилар тиббий кўрикдан, уларнинг автомобиллари эса техник кўрикдан ўтади, бу йўловчилар хавфсизлиги фойдасига ишлайди.
Умуман олганда, хизмат кўрсатиш сифати яхшиланади, сервис, шу жумладан, сайёҳлар учун жозибалироқ бўлади. Сафар нархи қатъий белгиланади. Соҳа кўтарилишни бошлайди.
Мушег Саакян, «Яндекс.Такси» халқаро ривожланиш бўйича директори:
Бизнинг фикримизча, бу мамлакатда ташувлар бозорини анча яхшилайдиган муҳим ва ўз вақтидаги қарор.Ҳозир такси хизматини кўрсатиш учун лицензия фақат таксопаркларга берилади. Хусусий ҳайдовчи қонуний йўл билан таксичилик қилмоқчи бўлса, дастлаб машинасини таксопаркка ижарага бериши, сўнг ўз машинасида одам ташиш учун таксопарк билан меҳнат шартномасини тузиши керак. Табиийки, кўпчилик ҳайдовчилар бундай оворагарчиликдан воз кечади.
Янги қарордан давлат ҳам, таксопарклар ҳам, «Яндекс.Такси» каби агрегаторлар ҳам — ҳамма ютади.
Биз учун эса қарор якка тадбиркор сифатида рўйхатдан ўтган ҳайдовчиларга ва «Яндекс.Такси» орқали буюртмалар олишни истовчиларга шерикларимиз орқали тизимга уланиш анча осонлашишини билдиради.
Изоҳ (0)