O‘zbekiston Prezidenti Shavkat Mirziyoyevning Dushanbega tashrifi vaqtida unga Tojikiston Milliy universiteti (TMU)ning faxriy fan doktori unvoni topshiriladi. Bu haqda, Tojikiston hukumatidagi manbaga asoslanib, “TojikTA” agentligi xabar bermoqda.
Xabar berishlaricha, davlat tashrifi davomida O‘zbekiston Prezidenti Tojikiston Milliy universitetida bo‘ladi, oliygohning professor-o‘qituvchilar tarkibi va talabalari bilan uchrashadi.
“TojikTA”ning qo‘shimcha qilishicha, bungacha Tojikistonning sobiq prezidenti Burhoniddin Rabboniy, Qozog‘istonning amaldagi prezidenti Nursulton Nazarboyev hamda Ozarbayjon davlat rahbari Ilhom Aliyevga TMUning faxriy doktorlik unvoni topshirilgan.
Tojikiston Milliy universiteti mamlakatning eng yirik oliygohi bo‘lib, unda hozirgi vaqtda qariyb 22 ming talaba 19 fakultetda, 100 mutaxassislik bo‘yicha tahsil oladi.
Ma’lumot uchun, tojik nashrlari tarqatgan axborotga ko‘ra, O‘zbekiston Prezidenti Shavkat Mirziyoyevning Tojikistonga davlat tashrifi 9—10-mart kunlari bo‘lib o‘tadi.
Izoh (0)