Hindistonning Maxarashtra shtatida yashovchi 69 yoshli Prakash Amte tabiatni muhofaza qilish borasidagi faoliyati uchun butun jahonda e’tirof etilgan, deb yozadi National Geographic. Yovvoyi hayvonlarga u 70-yillardan buyon yordam ko‘rsatib keladi.
Hammasi asosan ovchilik bilan shug‘ullanib kun kechiradigan Madia Gond qabilasi qo‘lidan maymun bolasini oziq-ovqat va kiyim-kechak evaziga qutqarib olgan kundan boshlangan. Shundan keyin Prakash qabila odamlari bilan bitim tuzib olgan: ular yeguliklar va kiyimlar evaziga o‘zlari o‘ldirgan hayvonlarning bolalarini unga berishga rozi bo‘lgan.
Biroz vaqt o‘tgach, Amtening uyi yonida chiyabo‘rilar, qoplonlar, suvsarlar, ayiqlar, antilopalar, ilonlar, timsohlar, tovuslar, jayralar — jami 300 turdagi turli-tuman hayvonlar yashay boshlagan. Jonivorlar ulg‘aygach, tabiiy muhitga qo‘yib yuborilgan, ularning o‘rniga yangi jonivorlar kelgan.
Qo‘shnilar shikoyati bilan hukumat hududni to‘sib qo‘yishni so‘ragan, shu tariqa bu yer haqiqiy qo‘riqxonaga aylangan.
Ayni paytda oila 90—100 jonivorga g‘amxo‘rlik qiladi, bunga Madia Gond qabilasi odamlari ovchilik bilan kamroq shug‘ullana boshlagani sababchidir.
Animal Ark qo‘riqxonasida hayvonlarni nafaqat uning asoschilari, balki ularning farzandlari va nevaralari ham parvarish qiladi. Prakash Amte ko‘plab xalqaro mukofotlarni qo‘lga kiritgan, u haqda filmlar suratga olishadi, hatto Monako knyazligi uning sharafiga marka ham chiqargan.
Izoh (0)