Oq uy xodimlari devoni rahbari Jon Kelli va AQSh maxfiy xizmati xodimi AQSh prezidenti Donald Trampning o‘tgan yil noyabridagi Pekinga tashrifi chog‘ida davlat rahbarining “yadro jomadonchasi” sababli Xitoy xavfsizlik xizmati vakillari bilan mushtlashib ketishiga oz qolgan. Bu haqda Axios axborot portali vaziyatdan xabardor manbalariga tayanib xabar berdi, deb yozadi “TASS”.
Hodisa prezident delegatsiyasining Xitoy poytaxtidagi Xalq yig‘inlari saroyiga tashrifi chog‘ida yuz bergan. Yadro kodlari bo‘lgan jomadonchani tashish uchun javob beruvchi maxfiy xizmat agentlaridan biri delegatsiyaning qolgan a’zolari bilan birgalikda Xitoy parlamenti binosiga kirmoqchi bo‘lgan, ammo uni xavfsizlik xizmati vakillari to‘xtatib qolgan, shundan so‘ng u Kellini chaqirgan. Kelli esa agentga hamma bilan birga yurishni buyurgan.
Shunda Kelli Xitoy xavfsizlik xizmati vakilining qo‘lini changallab olgan, u esa bunga javoban uni keskin itarib yuborgan. “Yadro jomadonchasi”ni ko‘targan agent ham xitoylik soqchini itarib, hatto uni yerga qulatgan.
Keyinroq Xitoy hukumati vakillari Vashingtondan uzr so‘rab, voqeani bosdi-bosdi qilishni so‘ragan.
“Yadro jomadonchasi” maxfiy kodlardan iborat qora sumka bo‘lib, ushbu kodlar yordamida Amerika yetakchisi yadro zarbasini berish haqida buyruq berishi mumkin. Ushbu kodlarni olib yurish uchun mas’ul bo‘lgan maxfiy xizmat xodimi hamma vaqt prezidentning yonida yurishga majburdir.
Izoh (0)