Ramzan Qodirov Dog‘istondagi cherkovga hujum qilgan shaxsni musulmon deb atab bo‘lmasligini aytdi

Checheniston rahbari Ramzan Qodirov Dog‘istonning Kizlyar shahrida pravoslav cherkoviga hujum qilgan shaxs musulmon deb atalishga haqli emasligini aytdi, deb yozadi “Vedomosti”.

“Men Kizlyardagi qonli voqeadan larzaga keldim. Mahalliy fuqaro tomonidan ov miltig‘i bilan sodir etgan otishmada odamlar halok bo‘ldi va jabrlandi. Buni hech qanaqasiga oqlab bo‘lmaydi”, — deb yozdi Qodirov Telegram’dagi kanalida.

Checheniston rahbari fikricha, o‘qotar na musulmon va na nasroniy. “U hech bir dinga aloqador emas. Dindor odam hech qachon gunohsiz odamlarning hayotiga tajovuz qilmaydi”, — deb ta’kidladi u.

Avvalroq IShID guruhi Dog‘istonning Kizlyar shahridagi hujum uchun javobgarlikni o‘z bo‘yniga olgani xabar berilgan edi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.