Ҳиндистонлик оила ўз уйида қўриқхона очиб, 40 йилдан буён ёввойи ҳайвонлар болаларини парвариш қилмоқда

Ҳиндистоннинг Maxараштра штатида яшовчи 69 ёшли Пракаш Амте табиатни муҳофаза қилиш борасидаги фаолияти учун бутун жаҳонда эътироф этилган, деб ёзади National Geographic. Ёввойи ҳайвонларга у 70 йиллардан буён ёрдам кўрсатиб келади.

Ҳаммаси асосан овчилик билан шуғулланиб кун кечирадиган Madia Gond қабиласи қўлидан маймун боласини озиқ-овқат ва кийим-кечак эвазига қутқариб олган кундан бошланган. Шундан кейин Пракаш қабила одамлари билан битим тузиб олган: улар егуликлар ва кийимлар эвазига ўзлари ўлдирган ҳайвонларнинг болаларини унга беришга рози бўлган.

Бироз вақт ўтгач, Амтенинг уйи ёнида чиябўрилар, қоплонлар, сувсарлар, айиқлар, антилопалар, илонлар, тимсоҳлар, товуслар, жайралар — жами 300 турдаги турли-туман ҳайвонлар яшай бошлаган. Жониворлар улғайгач, табиий муҳитга қўйиб юборилган, уларнинг ўрнига янги жониворлар келган.

Қўшнилар шикояти билан ҳукумат ҳудудни тўсиб қўйишни сўраган, шу тариқа бу ер ҳақиқий қўриқхонага айланган.

Айни пайтда оила 90—100 жониворга ғамхўрлик қилади, бунга Madia Gond қабиласи одамлари овчилик билан камроқ шуғуллана бошлагани сабабчидир.

Animal Ark қўриқхонасида ҳайвонларни нафақат унинг асосчилари, балки уларнинг фарзандлари ва неваралари ҳам парвариш қилади. Пракаш Амте кўплаб халқаро мукофотларни қўлга киритган, у ҳақда фильмлар суратга олишади, ҳатто Монако князлиги унинг шарафига марка ҳам чиқарган.