Janubiy Koreya prezidenti Mun Chje In O‘zbekistonga keladi. Bu haqda mamlakatning Toshkentdagi Favqulodda va muxtor elchisi Kvon Yon U O‘zbekiston — Janubiy Koreya biznes-forumida ma’lum qildi, deya xabar beradi “Xalq so‘zi”.
Diplomatga ko‘ra, Prezident Shavkat Mirziyoyevning o‘tgan yil noyabr oyida Janubiy Koreyaga amalga oshirgan tashrifi yaqin hamkorlikka mustahkam poydevor yaratdi, ikki tomonlama munosabatlarni yuqori bosqichga olib chiqdi. Umumiy qiymati 10 milliard dollardan oshiq shartnomalar imzolandi, energetika va resurslar, savdo-sotiq, investitsiya va moliya kabi yo‘nalishlarda kelishuvlarga erishildi.
Elchi Janubiy Koreya korporatsiyalari O‘zbekiston bilan hamkorlikni yanada kuchaytirishi zarurligini ta’kidladi. U mazkur biznes-muloqot ko‘plab amaliy natijalar berishiga umid bildirdi.
Eslatib o‘tamiz, Shavkat Mirziyoyev 13-fevral kuni Janubiy Koreya delegatsiyasiga boshchilik qilgan bosh vaziri o‘rinbosari Kim Dong Yonni qabul qildi.
Izoh (0)