Buxoro viloyati Peshku tumanidagi Varaxsha cho‘l massivida “Bunyodbek al-Buxoriy” mas’uliyati cheklangan jamiyatiga qarashli qum-shag‘al aralashmasini qayta ishlash zavodi ishga tushirildi. Bu haqda O‘zA xabar bermoqda.
Buxoro viloyatida eng yirik karyer xo‘jaligi hisoblangan ushbu zavod yiliga 30 ming kubmetrdan ziyod mahsulot tayyorlash quvvatiga ega. Yangi o‘zlashtirilgan konda bir necha o‘n yillarga yetadigan resurs zaxirasi mavjud.
Umumiy loyiha qiymati 452 ming dollarga teng korxona eng zamonaviy texnologiyalar bilan jihozlangan. Bu yerda poydevorbop temir-beton mahsulotlari, avtomobil yo‘llari va boshqa maqsadlarga mo‘ljallangan qum-shag‘al ishlab chiqariladi.
Korxonada 48 kishi mehnat qilmoqda. Yil oxirigacha xomashyoning bir qismi qayta ishlanib, temir-beton mahsulotlari tayyorlash ham yo‘lga qo‘yilishi kutilmoqda. Shuning hisobidan yana 20 ish o‘rni yaratiladi.
Viloyatda qurilish materiallariga bo‘lgan talab tobora ortib borayotganini inobatga olib, qurilish industriyasini rivojlantirishga alohida e’tibor qaratilmoqda. Joriy yilda ushbu yo‘nalishda umumiy qiymati 679 milliard 364 million so‘mlik 24 loyihani amalga oshirish rejalashtirilgan. Bu 1,2 mingdan ortiq yangi ish o‘rni yaratish imkonini beradi.
Izoh (0)