Жанубий Корея президенти Мун Чжэ Ин Ўзбекистонга келади. Бу ҳақда мамлакатнинг Тошкентдаги Фавқулодда ва мухтор элчиси Квон Ён У Ўзбекистон — Жанубий Корея бизнес-форумида маълум қилди, дея хабар беради «Халқ сўзи».
Дипломатга кўра, Президент Шавкат Мирзиёевнинг ўтган йил ноябрь ойида Жанубий Кореяга амалга оширган ташрифи яқин ҳамкорликка мустаҳкам пойдевор яратди, икки томонлама муносабатларни юқори босқичга олиб чиқди. Умумий қиймати 10 миллиард доллардан ошиқ шартномалар имзоланди, энергетика ва ресурслар, савдо-сотиқ, инвестиция ва молия каби йўналишларда келишувларга эришилди.
Элчи Жанубий Корея корпорациялари Ўзбекистон билан ҳамкорликни янада кучайтириши зарурлигини таъкидлади. У мазкур бизнес-мулоқот кўплаб амалий натижалар беришига умид билдирди.
Эслатиб ўтамиз, Шавкат Мирзиёев 13 февраль куни Жанубий Корея делегациясига бошчилик қилган бош вазири ўринбосари Ким Донг Ённи қабул қилди.
Изоҳ (0)