Бухоро вилояти Пешку туманидаги Варахша чўл массивида «Бунёдбек ал-Бухорий» масъулияти чекланган жамиятига қарашли қум-шағал аралашмасини қайта ишлаш заводи ишга туширилди. Бу ҳақда ЎзА хабар бермоқда.
Бухоро вилоятида энг йирик карьер хўжалиги ҳисобланган ушбу завод йилига 30 минг кубметрдан зиёд маҳсулот тайёрлаш қувватига эга. Янги ўзлаштирилган конда бир неча ўн йилларга етадиган ресурс захираси мавжуд.
Умумий лойиҳа қиймати 452 минг долларга тенг корхона энг замонавий технологиялар билан жиҳозланган. Бу ерда пойдеворбоп темир-бетон маҳсулотлари, автомобиль йўллари ва бошқа мақсадларга мўлжалланган қум-шағал ишлаб чиқарилади.
Корхонада 48 киши меҳнат қилмоқда. Йил охиригача хом ашёнинг бир қисми қайта ишланиб, темир-бетон маҳсулотлари тайёрлаш ҳам йўлга қўйилиши кутилмоқда. Шунинг ҳисобидан яна 20 иш ўрни яратилади.
Вилоятда қурилиш материалларига бўлган талаб тобора ортиб бораётганини инобатга олиб, қурилиш индустриясини ривожлантиришга алоҳида эътибор қаратилмоқда. Жорий йилда ушбу йўналишда умумий қиймати 679 миллиард 364 миллион сўмлик 24 лойиҳани амалга ошириш режалаштирилган. Бу 1,2 мингдан ортиқ янги иш ўрни яратиш имконини беради.
Изоҳ (0)