“Adolat” sotsial-demokratik partiyasining nashri — “Adolat” gazetasining 2018-yil 6-sonida Farg‘ona viloyati Oltiariq tumani “Qiziltepa” mahalla fuqarolar yig‘inida istiqomat qiluvchi Hasanboy Yunusovning xati e’lon qilindi. Unda Oltiariq tuman hokimi va tuman IIB boshlig‘i tomonidan haydab ketilgan 65 qo‘y “yo‘qolib qolgani” haqida so‘z boradi.
Men vaqtincha ishsizman. Ro‘zg‘orni tebratish uchun uyda qo‘y boqib, sotaman. Bolalarimning rizqi ham shunga qarab qolgan. Afsuski, 20 kundan buyon oilamizning tinchi buzilgan.“Xabar.uz”ning aniqlik kiritishicha, “aybdor” qo‘ylarning g‘alla maydoniga kirib ketganiga dastlab Farg‘ona viloyati hokimi Shuhrat G‘aniyev guvoh bo‘lgan, so‘ng tuman hokimi va IIB boshlig‘ini chaqirtirib, chora ko‘rish haqida topshiriq bergan.2018-yilning 20-yanvar kuni soat 16:00 da qo‘shnilarim Rahmatjon Abduqahhorov va Raim Qodirov bilan qo‘ylarimizni “Qiziltepa” MFY hududidagi “Shohimardonsoy” fermer xo‘jaligi yonidagi zovur yoqasida boqayotgan edik. Bir sovliq tug‘a boshladi. Biz shu bilan ovora bo‘lib qolibmiz. Qo‘ylarning bir qismi fermer xo‘jaligiga qarashli g‘alla ekilgan maydonga kirib ketibdi.
Shu voqea ustiga tuman hokimi va IIB boshlig‘i kelib qoldi. Qo‘ylarga e’tiborsiz bo‘lganimiz uchun ming pushaymon ekanimizni bildirsak-da, IIB boshlig‘i va mahalla noziri qo‘ylarni haydab ketdi.
22-yanvar kuni Oltiariq tuman ma’muriy sudi ushbu ishni ko‘rib chiqib, aybimizga iqror ekanimizni hisobga olib, har birimizga jarima belgiladi. Uni vaqtida to‘ladik. Bundan tashqari, “Shohimardonsoy” fermer xo‘jaligiga yetkazilgan zarar — 1 320 000 so‘mni ham o‘z ixtiyorimiz bilan qoplab berdik.
Hech kimda bizga qarshi da’vo qolmaganidan so‘ng, qo‘ylarni so‘rab, tuman hokimi X.Niyozovga uchrashdik. Hokimbuva “qo‘ylaringizni bilmayman”, dedi. IIB boshlig‘i I.Saydinov qabuliga bordik. U ham qo‘ylarning taqdiridan bexabar ekanini, bu ish bilan shug‘ullanmasligini bildirdi.
Ushbu masalada yordam so‘rab viloyat hokimi huzuriga borishga jazm etdik. Afsuski, hokimning qabuliga kiritish uyoqda tursin, dardimizni eshitishni ham istashmadi. Shundan buyon qo‘ylarni olish ilinjida qilgan murojaatlarimiz havoda qolib ketmoqda.
Nahotki mening aybim bilan oila a’zolarim, qo‘shnim Rahmatjon va Raimlarning farzandlari kam-ko‘stini but qilib kelgan 65 bosh qo‘y o‘z-o‘zidan “yo‘qolib” qolsa?
Hududimizda oila boqish uchun hech qanday ishlab chiqarish korxonasi va ish o‘rni yo‘q. Ko‘pchilik ishsiz. Yoshlar ish qidirib Rossiyaga boradi. Borolmaganlar esa mol va qo‘y boqib, ro‘zg‘or tebratadi.
Yuqorida ta’kidlaganimdek, men ham shu ish ortidan farzandlarimni voyaga yetkazayapman. Afsuski, shuni ham bizdan tortib olishdi. Sizlardan iltimos, menga va qo‘shnilarimga tegishli qo‘ylarni olishda yordam bering. Biz yo‘l qo‘ygan xatomizdan ming bora pushaymonmiz.
Hasanboy Yunusov
Farg‘ona viloyati hokimligi va Oltiariq tumani rasmiylari hozircha ushbu holat yuzasidan biror bayonot yo axborot berganicha yo‘q.
Izoh (0)