«Адолат» социал-демократик партиясининг нашри — «Адолат» газетасининг 2018 йил 6-сонида Фарғона вилояти Олтиариқ тумани «Қизилтепа» маҳалла фуқаролар йиғинида истиқомат қилувчи Ҳасанбой Юнусовнинг хати эълон қилинди. Унда Олтиариқ туман ҳокими ва туман ИИБ бошлиғи томонидан ҳайдаб кетилган 65 қўй «йўқолиб қолгани» ҳақида сўз боради.
Мен вақтинча ишсизман. Рўзғорни тебратиш учун уйда қўй боқиб, сотаман. Болаларимнинг ризқи ҳам шунга қараб қолган. Афсуски, 20 кундан буён оиламизнинг тинчи бузилган.«Xabar.uz»нинг аниқлик киритишича, «айбдор» қўйларнинг ғалла майдонига кириб кетганига дастлаб Фарғона вилояти ҳокими Шуҳрат Ғаниев гувоҳ бўлган, сўнг туман ҳокими ва ИИБ бошлиғини чақиртириб, чора кўриш ҳақида топшириқ берган.2018 йилнинг 20 январь куни соат 16:00 да қўшниларим Раҳматжон Абдуқаҳҳоров ва Раим Қодиров билан қўйларимизни «Қизилтепа» МФЙ ҳудудидаги «Шоҳимардонсой» фермер хўжалиги ёнидаги зовур ёқасида боқаётган эдик. Бир совлиқ туға бошлади. Биз шу билан овора бўлиб қолибмиз. Қўйларнинг бир қисми фермер хўжалигига қарашли ғалла экилган майдонга кириб кетибди.
Шу воқеа устига туман ҳокими ва ИИБ бошлиғи келиб қолди. Қўйларга эътиборсиз бўлганимиз учун минг пушаймон эканимизни билдирсак-да, ИИБ бошлиғи ва маҳалла нозири қўйларни ҳайдаб кетди.
22 январь куни Олтиариқ туман маъмурий суди ушбу ишни кўриб чиқиб, айбимизга иқрор эканимизни ҳисобга олиб, ҳар биримизга жарима белгилади. Уни вақтида тўладик. Бундан ташқари, «Шоҳимардонсой» фермер хўжалигига етказилган зарар — 1 320 000 сўмни ҳам ўз ихтиёримиз билан қоплаб бердик.
Ҳеч кимда бизга қарши даъво қолмаганидан сўнг, қўйларни сўраб, туман ҳокими Х.Ниёзовга учрашдик. Ҳокимбува «қўйларингизни билмайман», деди. ИИБ бошлиғи I.Сайдинов қабулига бордик. У ҳам қўйларнинг тақдиридан бехабар эканини, бу иш билан шуғулланмаслигини билдирди.
Ушбу масалада ёрдам сўраб вилоят ҳокими ҳузурига боришга жазм этдик. Афсуски, ҳокимнинг қабулига киритиш уёқда турсин, дардимизни эшитишни ҳам исташмади. Шундан буён қўйларни олиш илинжида қилган мурожаатларимиз ҳавода қолиб кетмоқда.
Наҳотки менинг айбим билан оила аъзоларим, қўшним Раҳматжон ва Раимларнинг фарзандлари кам-кўстини бут қилиб келган 65 бош қўй ўз-ўзидан «йўқолиб» қолса?
Ҳудудимизда оила боқиш учун ҳеч қандай ишлаб чиқариш корхонаси ва иш ўрни йўқ. Кўпчилик ишсиз. Ёшлар иш қидириб Россияга боради. Боролмаганлар эса мол ва қўй боқиб, рўзғор тебратади.
Юқорида таъкидлаганимдек, мен ҳам шу иш ортидан фарзандларимни вояга етказаяпман. Афсуски, шуни ҳам биздан тортиб олишди. Сизлардан илтимос, менга ва қўшниларимга тегишли қўйларни олишда ёрдам беринг. Биз йўл қўйган хатомиздан минг бора пушаймонмиз.
Ҳасанбой Юнусов
Фарғона вилояти ҳокимлиги ва Олтиариқ тумани расмийлари ҳозирча ушбу ҳолат юзасидан бирор баёнот ё ахборот берганича йўқ.
Изоҳ (0)