O‘zbekiston tadbirkorlari 2017-yildagi faoliyatini ijobiy baholadi

2017-yilda O‘zbekiston tadbirkorlarining yarmidan ko‘pi olgan daromadini ishlab chiqarishni modernizatsiyalash va kengaytirish, zamonaviy uskunalar xarid qilish, raqobatbardosh mahsulotlar ishlab chiqarish uchun korxonalariga qayta sarmoya tarzida kiritdi. “Ijtimoiy fikr” jamoatchilik fikrini o‘rganish markazi tomonidan o‘tkazilgan so‘rov natijalari shundan dalolat bermoqda, deya xabar beradi O‘zA.

So‘rov natijalari shuni ko‘rsatdiki, tadbirkorlar va fermerlarning aksariyati (84,7 foizi) ishbilarmonlik muhitini ijobiy baholaydi.

Respondentlar fikricha, tadbirkorlik sub’ektlariga davlat xizmatlari ko‘rsatuvchi “yagona darcha” markazining hokimliklar tuzilmasidan Adliya vazirligi tasarrufiga o‘tkazilgani tadbirkorlik sub’ektlariga ko‘rsatiladigan davlat xizmatlari sifati, hammabopligi va ochiqligini yanada oshirishda muhim ahamiyat kasb etdi. Shuningdek, Vazirlar Mahkamasi qoshida Tadbirkorlik faoliyatini rivojlantirishni qo‘llab-quvvatlash davlat jamg‘armasining tashkil qilinishiga ham ijobiy fikr bildirildi.

So‘rovda qatnashgan tadbirkorlarning yarmidan ko‘pi 2017-yilda o‘z faoliyatida salmoqli ijobiy natijalarga erishgani, kutilgan daromadga ega bo‘lgani yoki o‘z korxonalarini rivojlantirishning prognoz qilingan ko‘rsatkichlarini ta’minlaganini qayd etdi. Ishtirokchilarning 66,4 foizi mamlakatda barcha korxonalar uchun teng huquq va imkoniyatlar taqdim etilganini tasdiqladi.

Jamoatchilik fikrini o‘rganish O‘zbekistonda ishbilarmonlik muhitini yanada yaxshilash uchun keng rezervlar mavjudligini ko‘rsatdi. Bank kreditlarini olishda qiyinchiliklar yo‘qligi, suv, gaz, elektr bilan uzluksiz ta’minlanish va soliqlarning kamaytirilishi shular jumlasidandir.

Tadbirkorlar fiskal siyosat, shuningdek, kichik biznes va xususiy tadbirkorlikni rivojlantirish yo‘lida taqdim etilgan ko‘plab imtiyoz va preferensiyalar o‘z daromadini yashirmay, aksincha, uni ochiq ko‘rsatishga undaydi, degan umumiy to‘xtamga kelgan.

So‘rov natijalari davlat organlari tomonidan korxonalarda o‘tkaziladigan tekshiruvlar soni keskin kamaygani, tekshiruvlar tobora profilaktik va maslahat tusini olayotgani, turli kamchiliklarni aniqlash va ularni bartaraf etishga yordam berayotganini ko‘rsatdi.

Shunga qaramay, respondentlarning aksariyati nazorat organlari tomonidan yo‘l qo‘yilayotgan korrupsiya holatlariga duch kelmoqda. Har uchinchi ishtirokchi huquqi buzilgan yoki poymol qilingan taqdirda Prezidentning Virtual qabulxonasi, prokuratura yoki mahalliy hokimlikka qonuniy huquqlarini himoya qilish uchun murojaat etishga tayyorligini bildirgan.