2017 йилда Ўзбекистон тадбиркорларининг ярмидан кўпи олган даромадини ишлаб чиқаришни модернизациялаш ва кенгайтириш, замонавий ускуналар харид қилиш, рақобатбардош маҳсулотлар ишлаб чиқариш учун корхоналарига қайта сармоя тарзида киритди. «Ижтимоий фикр» жамоатчилик фикрини ўрганиш маркази томонидан ўтказилган сўров натижалари шундан далолат бермоқда, дея хабар беради ЎзА.
Сўров натижалари шуни кўрсатдики, тадбиркорлар ва фермерларнинг аксарияти (84,7 фоизи) ишбилармонлик муҳитини ижобий баҳолайди.
Респондентлар фикрича, тадбиркорлик субъэктларига давлат хизматлари кўрсатувчи «ягона дарча» марказининг ҳокимликлар тузилмасидан Адлия вазирлиги тасарруфига ўтказилгани тадбиркорлик субъэктларига кўрсатиладиган давлат хизматлари сифати, ҳаммабоплиги ва очиқлигини янада оширишда муҳим аҳамият касб этди. Шунингдек, Вазирлар Маҳкамаси қошида Тадбиркорлик фаолиятини ривожлантиришни қўллаб-қувватлаш давлат жамғармасининг ташкил қилинишига ҳам ижобий фикр билдирилди.
Сўровда қатнашган тадбиркорларнинг ярмидан кўпи 2017 йилда ўз фаолиятида салмоқли ижобий натижаларга эришгани, кутилган даромадга эга бўлгани ёки ўз корхоналарини ривожлантиришнинг прогноз қилинган кўрсаткичларини таъминлаганини қайд этди. Иштирокчиларнинг 66,4 фоизи мамлакатда барча корхоналар учун тенг ҳуқуқ ва имкониятлар тақдим этилганини тасдиқлади.
Жамоатчилик фикрини ўрганиш Ўзбекистонда ишбилармонлик муҳитини янада яхшилаш учун кенг резервлар мавжудлигини кўрсатди. Банк кредитларини олишда қийинчиликлар йўқлиги, сув, газ, электр билан узлуксиз таъминланиш ва солиқларнинг камайтирилиши шулар жумласидандир.
Тадбиркорлар фискал сиёсат, шунингдек, кичик бизнес ва хусусий тадбиркорликни ривожлантириш йўлида тақдим этилган кўплаб имтиёз ва преференциялар ўз даромадини яширмай, аксинча, уни очиқ кўрсатишга ундайди, деган умумий тўхтамга келган.
Сўров натижалари давлат органлари томонидан корхоналарда ўтказиладиган текширувлар сони кескин камайгани, текширувлар тобора профилактик ва маслаҳат тусини олаётгани, турли камчиликларни аниқлаш ва уларни бартараф этишга ёрдам бераётганини кўрсатди.
Шунга қарамай, респондентларнинг аксарияти назорат органлари томонидан йўл қўйилаётган коррупция ҳолатларига дуч келмоқда. Ҳар учинчи иштирокчи ҳуқуқи бузилган ёки поймол қилинган тақдирда Президентнинг Виртуал қабулхонаси, прокуратура ёки маҳаллий ҳокимликка қонуний ҳуқуқларини ҳимоя қилиш учун мурожаат этишга тайёрлигини билдирган.
Изоҳ (0)