Zoyir Mirzayev va Gyunter Overfeld Berlindagi yarmarkada o‘zbekistonlik tadbirkorlar ishtirokini ta’minlashni muhokama qildi

10-yanvar kuni O‘zbekiston bosh vazirining o‘rinbosari — qishloq va suv xo‘jaligi vaziri Zoyir Mirzayev Germaniyaning O‘zbekistondagi favqulodda va muxtor elchisi Gyunter Overfeld bilan uchrashuv o‘tkazdi. Bu haqda O‘zbekiston hukumat portali xabar bermoqda.

Suhbat chog‘ida ikki mamlakat o‘rtasidagi do‘stona aloqalarni yanada rivojlantirish, jumladan, qishloq xo‘jaligi ishlab chiqarishini mexanizatsiyalashtirish, mahsulotlarni qayta ishlash kabi sohalarga Germaniyaning yetakchi kompaniya va firmalarining zamonaviy texnologiya va texnikalarini jalb etish, shuningdek, joriy yil yanvar oyida Berlinda o‘tkaziladigan “Yashil hafta – 2018” xalqaro yarmarkasida o‘zbekistonlik tadbirkorlar, tashqi savdo kompaniyalari, qayta ishlovchi korxonalarining keng ishtirok etishini ta’minlash kabi dolzarb masalalar atroflicha muhokama etildi.