Surxondaryo viloyati Denov tumanining Obodon mahallasida yashaydigan 26 yoshli N.A. qo‘y o‘g‘irlab sotayotganda ashyoviy dalillar bilan qo‘lga olindi, deb xabar berdi O‘zA.
Qumqo‘rg‘on tumanida yashovchi fuqaro tumaning ichki ishlar idorasiga sakkiz bosh qo‘yi tunda o‘g‘irlab ketilgani haqida xabar bergan. Shu kunning o‘zida tergov tezkor guruhi voqea sodir bo‘lgan joy va uning atrofini o‘rganib, bir kilometrcha uzoqlikdagi adirda “Jiguli” avtomashinasiga tegishli izlar, KENT-6 sigaretining qoldig‘i, sport kiyimining aksiz markasi qolganini aniqlanadi.
Yo‘qolgan qo‘ylarni topish uchun tuman ichki ishlar bo‘limi xodimlari guruhlarga bo‘linib, zudlik bilan Surxondaryo viloyatidagi barcha mol bozorlarda kuzatuv ishlarini olib bordi. Sariosiyo tumanidagi Payshanba mol bozorida qulog‘iga qo‘shimcha plastina sirg‘a taqilgan ikki bosh qo‘y ularda shubha uyg‘otdi. Chunki, yangi sirg‘a taqilgan qo‘ylarning quloqlarida qotib qolgan qon dog‘lari bo‘lgan. Qo‘ylar surishtiruv ishlari olib borish uchun Sariosiyo tumani ichki ishlar bo‘limiga olib kelingach, masala oydinlashgan.
Ma’lum bo‘lishicha, N.A. ismli fuqaro tanishiga kechki payt qo‘ng‘iroq qilib, uning “Jiguli” rusumli avtomashinasida Qumqo‘rg‘on tumanidagi qo‘ylarini olib kelishni iltimos qilgan. Tungi payt Qumqo‘rg‘on tumaniga yetib kelgach, N.A. “o‘ljasi” saqlanayotgan molxonadan bir kilometrcha uzoqlikda avtomashinani to‘xtatgan. O‘g‘ri jabrlanuvchining uyi molxonasi yoniga kelib hech kim yo‘qligiga ishonch hosil qilgach, molxonadagi 20 bosh qo‘yni haydab, mashinagacha olib kelgan. 8 bosh qo‘yni “Jiguli”ga yuklagan. Yengil mashinaga sig‘magan 12 ta qo‘yni adirda qoldirib ketgan. Aylanma yo‘llar orqali Denov tumanidagi Qoraxon mahallasiga kelib, tungi soat ikkilar atrofida olti bosh qo‘yni 3 million 700 ming so‘mga sotib yuborgan. Qolgan ikki bosh qo‘yni kunduz kuni tushgacha Denov tumanidagi Bahoriston mahallasida yashovchi fuqaroga 800 ming so‘mga pullagan.
Shunday qilib, Qumqo‘rg‘onda yo‘qolgan qo‘ylar Denov va Sariosiyo tumanidan topilgan. Ayni paytda N.A.ning boshqa jinoyatlarga aloqadorligini aniqlash yuzasidan qo‘shimcha tergov-surishtiruv ishlari olib borilmoqda.
Izoh (0)