“O‘zbekyengilsanoat” AJ va Norm Ltd (Turkiya) kompaniyasi harbiy-texnika sohasida (kiyim-kechak bilan ta’minlash) o‘zaro hamkorlik o‘rnatish masalalarini muhokama qildi, deb yozadi UZ24.
Uchrashuv davomida O‘zbekiston Respublikasida to‘qimachilik va yengil sanoat sohasida hamkorlik o‘rnatish afzalliklari hamda xorijiy investorlar uchun yaratilgan qulay imkoniyatlar, shu jumladan, nisbatan arzon elektr energiyasi va ishchi kuchi, xomashyo mavjudligi (paxta tolasi) qayd etildi.
Uchrashuv yakunida o‘zbek paxta tolasining yuqori sifatliligini va Turkiya kompaniyasining karbon texnologiyalarini inobatga olgan holda, qo‘shma ishlab chiqarish korxonasi yaratish; Norm Ltd kompaniyasining texnologiyalarini O‘zbekistonga jalb etish, mahalliy ishlab chiqarishni barpo etish va turk mahsulotlarini O‘zbekiston yaqin hamkorlik qiladigan davlatlariga, ya’ni Xitoy, Rossiya, Qozog‘iston, Turkmaniston va Afg‘onistonga diversifikatsiya qilish haqida kelishuvga erishildi.
Tomonlar barpo qilinayotgan loyihani chuqur o‘rganish va aniq hamkorlik yo‘nalishlarini ishlab chiqish maqsadida, 2018-yilning yanvar oyida Turkiya kompaniyasi ishchi guruhini O‘zbekiston Respublikasiga jo‘natishga kelishib oldi.
Ma’lumot uchun: Norm Ltd kompaniyasi “nou-xau” va ilg‘or texnologiyalar asosida Turkiya qurolli kuchlari uchun to‘qimachilik mahsulotlari ishlab chiqarishda yetakchilardan hisoblanadi. Dunyoning bir qancha rivojlangan davlatlari, Hindiston, AQSh va Buyuk Britaniya turk kompaniyasining asosiy iste’molchilari hisoblanadi. Norm Ltd Hindistonda o‘z ishlab chiqaruvchi korxonasiga ega.
Izoh (0)