Сурхондарё вилояти Денов туманининг Ободон маҳалласида яшайдиган 26 ёшли Н.А. қўй ўғирлаб сотаётганда ашёвий далиллар билан қўлга олинди, деб хабар берди ЎзА.
Қумқўрғон туманида яшовчи фуқаро туманинг ички ишлар идорасига саккиз бош қўйи тунда ўғирлаб кетилгани ҳақида хабар берган. Шу куннинг ўзида тергов тезкор гуруҳи воқеа содир бўлган жой ва унинг атрофини ўрганиб, бир километрча узоқликдаги адирда «Жигули» автомашинасига тегишли излар, KENT-6 сигаретининг қолдиғи, спорт кийимининг аксиз маркаси қолганини аниқланади.
Йўқолган қўйларни топиш учун туман ички ишлар бўлими ходимлари гуруҳларга бўлиниб, зудлик билан Сурхондарё вилоятидаги барча мол бозорларда кузатув ишларини олиб борди. Сариосиё туманидаги Пайшанба мол бозорида қулоғига қўшимча пластина сирға тақилган икки бош қўй уларда шубҳа уйғотди. Чунки, янги сирға тақилган қўйларнинг қулоқларида қотиб қолган қон доғлари бўлган. Қўйлар суриштирув ишлари олиб бориш учун Сариосиё тумани ички ишлар бўлимига олиб келингач, масала ойдинлашган.
Маълум бўлишича, Н.А. исмли фуқаро танишига кечки пайт қўнғироқ қилиб, унинг «Жигули» русумли автомашинасида Қумқўрғон туманидаги қўйларини олиб келишни илтимос қилган. Тунги пайт Қумқўрғон туманига етиб келгач, Н.А. «ўлжаси» сақланаётган молхонадан бир километрча узоқликда автомашинани тўхтатган. Ўғри жабрланувчининг уйи молхонаси ёнига келиб ҳеч ким йўқлигига ишонч ҳосил қилгач, молхонадаги 20 бош қўйни ҳайдаб, машинагача олиб келган. 8 бош қўйни «Жигули»га юклаган. Енгил машинага сиғмаган 12 та қўйни адирда қолдириб кетган. Айланма йўллар орқали Денов туманидаги Қорахон маҳалласига келиб, тунги соат иккилар атрофида олти бош қўйни 3 миллион 700 минг сўмга сотиб юборган. Қолган икки бош қўйни кундуз куни тушгача Денов туманидаги Баҳористон маҳалласида яшовчи фуқарога 800 минг сўмга пуллаган.
Шундай қилиб, Қумқўрғонда йўқолган қўйлар Денов ва Сариосиё туманидан топилган. Айни пайтда Н.А.нинг бошқа жиноятларга алоқадорлигини аниқлаш юзасидан қўшимча тергов-суриштирув ишлари олиб борилмоқда.
Изоҳ (0)