«Ўзбекенгилсаноат» АЖ ва Norm Ltd (Туркия) компанияси ҳарбий-техника соҳасида (кийим-кечак билан таъминлаш) ўзаро ҳамкорлик ўрнатиш масалаларини муҳокама қилди, деб ёзади UZ24.
Учрашув давомида Ўзбекистон Республикасида тўқимачилик ва енгил саноат соҳасида ҳамкорлик ўрнатиш афзалликлари ҳамда хорижий инвесторлар учун яратилган қулай имкониятлар, шу жумладан, нисбатан арзон электр энергияси ва ишчи кучи, хом ашё мавжудлиги (пахта толаси) қайд этилди.
Учрашув якунида ўзбек пахта толасининг юқори сифатлилигини ва Туркия компаниясининг карбон технологияларини инобатга олган ҳолда, қўшма ишлаб чиқариш корхонаси яратиш; Norm Ltd компаниясининг технологияларини Ўзбекистонга жалб этиш, маҳаллий ишлаб чиқаришни барпо этиш ва турк маҳсулотларини Ўзбекистон яқин ҳамкорлик қиладиган давлатларига, яъни Хитой, Россия, Қозоғистон, Туркманистон ва Афғонистонга диверсификация қилиш ҳақида келишувга эришилди.
Томонлар барпо қилинаётган лойиҳани чуқур ўрганиш ва аниқ ҳамкорлик йўналишларини ишлаб чиқиш мақсадида, 2018 йилнинг январь ойида Туркия компанияси ишчи гуруҳини Ўзбекистон Республикасига жўнатишга келишиб олди.
Маълумот учун: Norm Ltd компанияси «ноу-хау» ва илғор технологиялар асосида Туркия қуролли кучлари учун тўқимачилик маҳсулотлари ишлаб чиқаришда етакчилардан ҳисобланади. Дунёнинг бир қанча ривожланган давлатлари, Ҳиндистон, АҚШ ва Буюк Британия турк компаниясининг асосий истеъмолчилари ҳисобланади. Norm Ltd Ҳиндистонда ўз ишлаб чиқарувчи корхонасига эга.
Изоҳ (0)