Facebook’dagi “Jizzaxliklar hamjamiyati” guruhiga ijtimoiy tarmoq foydalanuvchilar tomonidan Hamid Olimjon va Zulfiyaxonim haykalining nurayotgani aks etgan suratlar joylashtirildi. Suratlar ostidagi izohlarda esa foydalanuvchilar mazkur holat achinarli ekanligini, shoshma-shosharlik bilan bunyod etilgan haykallarga sifatli materiallar ishlatilmaganligini ta’kidlagan, deb xabar berdi “Sangzor.uz”.
Mazkur yodgorlik tantanali tarzda 2017-yilning noyabr oyi boshida ochilgan edi. O‘rnatilganiga endigina ikki oy to‘lgan haykallar sifatsiz xomashyodan shoshma-shosharlik bilan yasalgani sabab nurab tushmoqda.
O‘zbekiston Prezidenti Shavkat Mirziyoyevning tavsiyasiga binoan amalga oshirilgan mazkur yodgorlikni bunyod etish ishlari aprel boshlangan edi. Juda ham qisqa muddatda amalga oshirilgan ishlar natijasida anchagina qarovsiz holga kelib qolgan xiyobon hududi tanib bo‘lmas darajada o‘zgardi. Quruvchilarning sa’y-harakati natijasida noyabr oyida ushbu hududda nafaqat haykal o‘rnatildi, balki Xo‘ja Nuriddin madrasasi rekonstruksiya qilinib, Hamid Olimjon va Zulfiya muzeylari, unga tutash binoda esa davlat va jamoat arbobi Sharof Rashidov muzeylari ish boshladi.
Izoh (0)