Urganchda oilaviy poliklinika noziri yosh kadrdan ishga joylab qo‘yish uchun 600 dollar olayotganida qo‘lga tushdi

Urganchda oilaviy poliklinika noziri yosh kadrdan “ishga joylab qo‘yish” uchun 600 dollar olayotganida qo‘lga tushdi. Bu haqda O‘zA xabar bermoqda.

Urganch shahrida yashovchi, 1980-yilda tug‘ilgan Ruxsora Sobirova (ism va sharifi o‘zgartirilgan) 2014-yildan buyon Urganch shahridagi oilaviy poliklinikalardan birida kadrlar bo‘yicha nozir bo‘lib ishlab kelayotgan edi.

Hamshiralik mutaxassisligiga ega bo‘lgan urganchlik Yulduzxon oilaviy poliklinikaga ish izlab kelganini ko‘rgan nozir ayol yosh kadrni avrashga tushdi. Hozirda bo‘sh ish o‘rni mavjudligi, ammo hamshiralik lavozimiga talabgorlar ham ko‘pligini aytdi. Shunday bo‘lsa-da, Yulduzxonni ishga joylab qo‘yishda yordam berishini va’da qilib, evaziga esa ayrim “kattakon”larning og‘zini moylash uchun 600 dollar zarur bo‘ladi, dedi.

Yulduzxon kadrlar bo‘yicha nozirning noqonuniy xatti-harakatlari yuzasidan tegishli idoraga ariza bilan murojaat etdi. Huquqni muhofaza qiluvchi organlar hamkorligida o‘tkazilgan tezkor tadbir jarayonida 600 dollarni firibgarlik yo‘li bilan qo‘lga kiritayotgan R. Sobirovaning jinoyati fosh etildi.

Hozirda mazkur holat yuzasidan dastlabki tergov harakatlari olib borilmoqda.