O‘zbekiston musulmonlari idorasi buyrug‘iga asosan 2018-yilning birinchi yarmida O‘zbekistonda Qur’on musobaqasini o‘tkazish belgilab olindi, deb xabar beradi idora matbuot xizmati.
Qur’on musobaqasida O‘zbekiston musulmonlari idorasi tasarrufidagi diniy ta’lim muassasalari va Toshkent islom universiteti talabalaridan tashqari, masjidlardagi imom-xatiblar, imom noiblari hamda Qur’oni karim qiroati bo‘yicha iqtidori bo‘lgan 18—40 yoshdagi barcha erkak va ayol fuqarolar ishtirok etishi mumkin.
Ishtirokchilar yoshga ko‘ra ikki guruhga taqsimlanadi:
18—25 yoshdagi ishtirokchilar;
25—40 yoshdagi ishtirokchilar.
Musobaqaning tuman (shahar) va viloyat bosqichlari, shuningdek, mazkur o‘quv yurtlaridagi saralash bosqichi 2018-yilning boshidan mart oyiga qadar hamda bularning barchasi uchun respublika bosqichi 2018-yil aprel oyida o‘tkazilishi rejalashtirilgan.
“Ayol-qizlar o‘rtasidagi Qur’on musobaqasi o‘ziga xos, sharqona tartiblarga rioya etilgan holda o‘tkazilishi ta’minlanadi. Bunga viloyatlardagi vakilliklar qoshida xizmat ko‘rsatayotgan otin oyilar mas’ul qilinadi”, — deyiladi xabarda.
O‘zbekiston qorilari musobaqasini yuqori saviyada o‘tkazish to‘g‘risida 18-dekabr kuni O‘zbekiston musulmonlari idorasi ulamolar kengashi qaror qabul qildi va ushbu musobaqa uchun diniy idora qoshida maxsus hay’at tuzildi. Ushbu hay’at butun Respublika bo‘ylab faoliyat yuritadi.
Musobaqada ishtirok etmoqchi bo‘lgan har bir fuqaro o‘z viloyatidagi O‘MI vakilligiga murojaat qilib, ro‘yxatdan o‘tadi. Ro‘yxatga olish 2018-yil 1-yanvardan 10-yanvargacha ertalab soat 09:00 dan kechgi soat 19:00 gacha davom etadi.
Izoh (0)