“Xayp” so‘zi 2017-yilda lug‘atlarda paydo bo‘ldi. Internetdagi shov-shuvlardan milliarderlar ham chetda qolmadi, ularning o‘z xayplari bor. Ular orasida eng mashhurlari — USM Holdings egasi Alisher Usmonov va Aleksey Navalniy hamda Oleg Tinkovning Nemagia blogerlari o‘rtasidagisi hisoblanadi. Bankirning YouTube’da paydo bo‘lishi yangilik bo‘lmasada, Forbesning sobiq 1-raqamlisi jamoatchilikka ilk bor internet orqali murojaat qildi, deb xabar berdi Forbes.
Alisher Usmonov va Aleksey Navalniy
Korrupsiyaga qarshi kurashish fondi mart oyida Rossiya bosh vaziri Medvedev haqida tergov filmini namoyish etdi (25 million marta tomosha qilingan). Unda Usmonov Dmitriy Medvedevning fondiga pora sifatida yer-mulk va narxi 5 milliard rubl turuvchi Moskva yaqinidan koshona sovg‘a qilgani haqida gap boradi.
Biznesmen Znamenskdagi yer-mulkning o‘rniga fonddan o‘z uyi yaqinidan 12 gektar yer olganini ma’lum qildi. Navalniyni sudga berib, unga ikkita videomurojaat yo‘lladi. Navalniyni Bulgakov asaridagi Sharikovga qiyosladi va unga o‘zidan kechirim so‘rashini taklif qildi. Usmonovning chiqishidan so‘ng, uning tasviri tushirilgan memlar, Telegram’da stikerlar paydo bo‘ldi. Keyinroq USM rahbari videomurojaatga bog‘liq ravishda “o‘z ijodini” namoyish etganlarga iPhone 7 Plus va’dasi ostida tanlov e’lon qildi.
Mavzuga doir: Alisher Usmonovning rossiyalik muxolifatchi Aleksey Navalniyga videomurojaati — o‘zbekcha subtitrlarda
Sud Navalniy va Korrupsiyaga qarshi kurashish fondiga “U sizga Dimon emas” filmini o‘chirib tashlash va milliarderni tahqirlaydigan ma’lumotlarni rad etish majburiyatini qo‘ydi.
Oleg Tinkov va Nemagia
Nemagia’ning mashhur blogerlari avgust oyida Tinkov hamda uning rafiqasi ustidan kulib ishlangan rolikni e’lon qilgandi. Rolikda bankir o‘z xodimlariga oylik bermaslikda va ularni haqoratlashda, shuningdek, pora berishda ayblangan.
Tinkov va “Tinkoff bank” sudga ikkita da’vo arizasini berdi va blogerlardan 500 000 rubl talab qildi. “Nemagia’ning bolalari chegarani kesib o‘tdi: ular muqaddas narsamga — oilamga tegindi, rafiqamni haqorat qildi”, — degan edi bankir.
Avgust oyining oxirida “Roskomnadzor” rolikni bloklash bo‘yicha qaror chiqardi. Tinkov va Nemagia o‘rtasidagi mojaro qisqa vaqt ichida o‘z nihoyasiga yetdi. “Huquq-tartibot organlari oligarxlarga xizmat qiladi? Shunchaki vaziyatga oydinlik kiritish kerak. Albatta ko‘rib chiqamiz”, — degan edi Rossiya prezidenti Vladimir Putin vaziyat yuzasidan.
Tinkov ikkala da’vo arizasini ham qaytarib oldi, va sud rolikka qo‘yilgan taqiqni olib tashladi.
Izoh (0)