«Хайп» сўзи 2017 йилда луғатларда пайдо бўлди. Интернетдаги шов-шувлардан миллиардерлар ҳам четда қолмади, уларнинг ўз хайплари бор. Улар орасида энг машҳурлари — USM Holdings эгаси Алишер Усмонов ва Алексей Навальний ҳамда Олег Тиньковнинг Nemagia блогерлари ўртасидагиси ҳисобланади. Банкирнинг YouTube’да пайдо бўлиши янгилик бўлмасада, Forbesнинг собиқ 1-рақамлиси жамоатчиликка илк бор интернет орқали мурожаат қилди, деб хабар берди Forbes.
Алишер Усмонов ва Алексей Навальний
Коррупцияга қарши курашиш фонди март ойида Россия бош вазири Медведев ҳақида тергов фильмини намойиш этди (25 миллион марта томоша қилинган). Унда Усмонов Дмитрий Медведевнинг фондига пора сифатида ер-мулк ва нархи 5 миллиард рубль турувчи Москва яқинидан кошона совға қилгани ҳақида гап боради.
Бизнесмен Знаменскдаги ер-мулкнинг ўрнига фонддан ўз уйи яқинидан 12 гектар ер олганини маълум қилди. Навальнийни судга бериб, унга иккита видеомурожаат йўллади. Навальнийни Булгаков асаридаги Шариковга қиёслади ва унга ўзидан кечирим сўрашини таклиф қилди. Усмоновнинг чиқишидан сўнг, унинг тасвири туширилган мемлар, Telegram’да стикерлар пайдо бўлди. Кейинроқ USM раҳбари видеомурожаатга боғлиқ равишда «ўз ижодини» намойиш этганларга iPhone 7 Plus ваъдаси остида танлов эълон қилди.
Мавзуга доир: Алишер Усмоновнинг россиялик мухолифатчи Алексей Навальнийга видеомурожаати — ўзбекча субтитрларда
Суд Навальний ва Коррупцияга қарши курашиш фондига «У сизга Димон эмас» фильмини ўчириб ташлаш ва миллиардерни таҳқирлайдиган маълумотларни рад этиш мажбуриятини қўйди.
Олег Тиньков ва Nemagia
Nemagia’нинг машҳур блогерлари август ойида Тиньков ҳамда унинг рафиқаси устидан кулиб ишланган роликни эълон қилганди. Роликда банкир ўз ходимларига ойлик бермасликда ва уларни ҳақоратлашда, шунингдек, пора беришда айбланган.
Тиньков ва «Тинькофф банк» судга иккита даъво аризасини берди ва блогерлардан 500 000 рубль талаб қилди. «Nemagia’нинг болалари чегарани кесиб ўтди: улар муқаддас нарсамга — оиламга тегинди, рафиқамни ҳақорат қилди», — деган эди банкир.
Август ойининг охирида «Роскомнадзор» роликни блоклаш бўйича қарор чиқарди. Тиньков ва Nemagia ўртасидаги можаро қисқа вақт ичида ўз ниҳоясига етди. «Ҳуқуқ-тартибот органлари олигархларга хизмат қилади? Шунчаки вазиятга ойдинлик киритиш керак. Албатта, кўриб чиқамиз», — деган эди Россия президенти Владимир Путин вазият юзасидан.
Тиньков иккала даъво аризасини ҳам қайтариб олди, ва суд роликка қўйилган тақиқни олиб ташлади.
Изоҳ (0)