Бу масала бўйича овоз беришлар ва муҳокамалар натижаларидан қатъи назар, Қуддус Исроил пойтахти бўлади. Бу ҳақда яҳудий давлатининг БМТдаги доимий вакили Данни Данон айтиб ўтди, деб ёзади «ТАСС». У буни АҚШ президенти Дональд Трампнинг Қуддусни Исроил пойтахти деб тан олиш қарорига жавобан, Хавфсизлик кенгашида бунга қарши резолюция лойиҳаси муҳокама қилинишини изоҳлаётиб маълум қилди.
«Ҳеч қандай овоз бериш Қуддус доим Исроилнинг пойтахти бўлгани ва шундай бўлиб қолишидан иборат аниқ-равшан воқеликни ўзгартирмайди. Иттифоқдошларимиз билан биргаликда биз тарихий адолат учун курашни давом эттирамиз», — дейилади дипломатнинг ёзма баёнотида.
У резолюция лойиҳаси эрамиздан аввалги II асрда Қуддуснинг озод этилгани хотирасига ўтказиладиган яҳудийлар байрами — Ханукани нишонлаш даврида кўриб чиқилаётгани юзасидан норозилик билдирди ҳамда фаластинликларни «тарихни қайта ёзишда» айблади.
Араб мамлакатлари 18 декабрь, душанба кунги овоз беришда ўз резолюцияси лойиҳасини киритмоқчи. Ҳужжат Фаластин-Исроил муносабатларини тартибга солишнинг мавжуд тамойилларини мустаҳкамлашга қаратилган, унга мувофиқ, Қуддуснинг мақоми томонлар ўртасидаги тўғридан-тўғри музокаралар чоғида белгиланиши керак.
Изоҳ (0)