O‘zbekiston Prezidenti Shavkat Mirziyoyevning Qoraqalpog‘iston Respublikasiga tashrifi davom etmoqda. Bugun, 16-dekabr kuni Shavkat Mirziyoyev o‘z tashrifni Nukus shahrida yangi qurilgan Ibroyim Yusupov nomidagi maktab-internati faoliyatining tanishuvidan boshladi, deb xabar berdi O‘zA.
Shavkat Mirziyoyev joriy yil 21-yanvar kuni Nukus shahrida Qoraqalpog‘iston va O‘zbekiston xalq shoiri, O‘zbekiston Qahramoni Ibroyim Yusupov nomidagi maktab bunyod etish, maktab oldida shoir haykalini o‘rnatish, bosmaxona tashkil qilish zarurligini ta’kidlagan edi.
Shunga muvofiq Nukusda uch qavatli zamonaviy maktab barpo etilgan. Ibroyim Yusupov haykali o‘rnatilgan joy ijodkorlar, yoshlar uchun yana bir xiyobonga aylangan. Maktab qoshida kitoblarni tarjima qilish va chop etish markazi ham tashkil etilgan.
O‘zbekiston Prezidenti bu yerda o‘qituvchi va o‘quvchilar, qoraqalpog‘istonlik adiblar bilan uchrashdi.
Maktab o‘quvchilari Ibroyim Yusupov she’rlaridan o‘qib berdi.
Shavkat Mirziyoyev bu yerni ma’naviyat maskaniga aylantirish, atoqli shoir va yozuvchilar ijodini xalqqa va butun dunyoga tarannum etish zarurligini ta’kidladi. Buning uchun O‘zbekistonning boshqa hududlarida tashkil etilgan Ibrat, Hamid Olimjon va Zulfiya, Erkin Vohidov, Abdulla Oripov, Muhammad Yusuf nomidagi maktablar bilan aloqalar o‘rnatish, ular o‘rtasida ijodiy tanlovlar o‘tkazish lozimligini qayd etdi.
Prezident maktab-internatda yaratilgan sharoitlarni ko‘zdan kechirdi. Maktab jamoasiga avtobus sovg‘a qilish bo‘yicha ko‘rsatma berdi.
Izoh (0)