Ўзбекистон Президенти Шавкат Мирзиёевнинг Қорақалпоғистон Республикасига ташрифи давом этмоқда. Бугун, 16 декабрь куни Шавкат Мирзиёев ўз ташрифни Нукус шаҳрида янги қурилган Ибройим Юсупов номидаги мактаб-интернати фаолиятининг танишувидан бошлади, деб хабар берди ЎзА.
Шавкат Мирзиёев жорий йил 21 январь куни Нукус шаҳрида Қорақалпоғистон ва Ўзбекистон халқ шоири, Ўзбекистон Қаҳрамони Ибройим Юсупов номидаги мактаб бунёд этиш, мактаб олдида шоир ҳайкалини ўрнатиш, босмахона ташкил қилиш зарурлигини таъкидлаган эди.
Шунга мувофиқ Нукусда уч қаватли замонавий мактаб барпо этилган. Ибройим Юсупов ҳайкали ўрнатилган жой ижодкорлар, ёшлар учун яна бир хиёбонга айланган. Мактаб қошида китобларни таржима қилиш ва чоп этиш маркази ҳам ташкил этилган.
Ўзбекистон Президенти бу ерда ўқитувчи ва ўқувчилар, қорақалпоғистонлик адиблар билан учрашди.
Мактаб ўқувчилари Ибройим Юсупов шеърларидан ўқиб берди.
Шавкат Мирзиёев бу ерни маънавият масканига айлантириш, атоқли шоир ва ёзувчилар ижодини халққа ва бутун дунёга тараннум этиш зарурлигини таъкидлади. Бунинг учун Ўзбекистоннинг бошқа ҳудудларида ташкил этилган Ибрат, Ҳамид Олимжон ва Зулфия, Эркин Воҳидов, Абдулла Орипов, Муҳаммад Юсуф номидаги мактаблар билан алоқалар ўрнатиш, улар ўртасида ижодий танловлар ўтказиш лозимлигини қайд этди.
Президент мактаб-интернатда яратилган шароитларни кўздан кечирди. Мактаб жамоасига автобус совға қилиш бўйича кўрсатма берди.
Изоҳ (0)