Yaponiya politsiyasi 14-dekabr, payshanba kuni M-Create kompaniyasining Tokioda joylashgan ofisida, shuningdek, uning bir qator filiallarida tintuvlar o‘tkazdi. “TASS”ning xabar berishicha, kompaniya qonunlarda belgilangan taqiqlarga zid o‘laroq, KXDRga mahsulot yetkazib berganlikda gumon qilinmoqda.
Kyodo agentligi ma’lumotlariga ko‘ra, bunda gap oziq-ovqat va boshqa turdagi mahsulotlar eksporti haqida bormoqda. M-Create firmasi 2007-yilda tashkil etilgan bo‘lib, asosan tamaki qoldiqlarini avtomatik to‘plovchi qurilmalarni ishlab chiqarishga ixtisoslashgan.
Bunday qurilmalar odatda Yaponiyada mashhur sanaladigan “patinko” o‘yin avtomatlari zallariga o‘rnatiladi. Bunday o‘yin zallarining aksariyati kelib chiqishi shimoliy koreyalik bo‘lgan shaxslar nazoratida, deb taxmin qilinadi; ular shu yo‘l bilan xorijiy valyuta ishlaydi.
Yaponiya tomonidan KXDRga nisbatan bir tomonlama joriy etilgan sanksiyalar sabab, yapon kompaniyalari Shimoliy Koreya bilan savdo operatsiyalarini amalga oshira olmaydi. 2016-yil boshida Yaponiya politsiyasi KXDRga birinchi ehtiyoj mollarini eksport qilganlikda ayblab, Tokiodagi savdo kompaniyalaridan birining rahbarini hibsga olgan edi.
Yaponiya hukumati Pxenyanga nisbatan sanksiyalarni so‘nggi bor 2017-yil noyabrida kuchaytirgan edi. O‘shanda sanksion ro‘yxatga 35 yuridik va jismoniy shaxs kiritilgan edi. Ko‘rilgan choralar amalda KXDR bilan savdoni, ma’lum bir toifa shaxslar uchun bu mamlakatga safarlarni taqiqlagan, shuningdek, Yaponiyadan Shimoliy Koreyaga pul o‘tkazmalarini cheklagan edi.
Izoh (0)